No por habri frontera aereo cu Venezuela ainda pasobra Departamento di Asilo no ta funciona manera debe ser

Ayera mainta, prome minister Evelyn Wever-Croes a tene un conferencia di prensa na unda el a presenta e relato anual di aña 2023 pa su ministerio. Durante e ronda di pregunta, e mandatario a ricibi pregunta for di un miembro di prensa cu a puntra riba e tema di apertura di frontera aereo pa vuelonan directo entre Aruba y Venezuela.

Manera ta conoci, 22 di januari ultimo, a traves di un comunicado di prensa, Gobierno di Aruba a anuncia cu a prolonga e ciere di e frontera pa luna di mei. Den luna di april a sali otro comunicado cu a indica cu a bolbe prolonga e ciere di e frontera aereo pa vuelonan directo. Un miembro di prensa a puntra prome minister kico por ta bayendo robes den e negociacionnan cu ta haci cu ta keda prolonga e ciere di frontera.

E mandatario a splica cu nada ta bayendo malo den negociacion y cu aworaki nan no ta ni negociandoariba e apertura aereo pa motibo cu e departamentonan concerni “simplemente no ta cla.”

El a sigui splica cu un di e preocupacionnan ta e Departamento di Asilo, cual ya caba tin hopi peticion pendiente. El a indica cu asilo ta cay bao un tratado di Nacionnan Uni cu ta mara na un cierto tempo cu mester atende cu e peticionnan, y aworaki nan no ta cumpliendo cu esey.

Prome minister a remarca cu si habri e frontera sin cu e departamento ta cla y nan bolbe haya hopi peticion di asilo, nan lo tin un problema serio pasobra e ora nan no por cumpli cu e tratado.

El a menciona cu minister Glenbert Croes tabata na Hulanda pa atende e tema di asilo y cu Hulanda ta bay yudele fortifica esaki.

“E prioridad aworaki ta pa minister Glenbert Croes percura pa nos tin un Departamento di Asilo cu ta funciona, cu suficiente hende y ekipo pa nan por haci e trabao,” el a subraya.

Prome minister a agrega cu den e cadena di husticia tambe tabatin reservanan.

Den luna di januari gobierno a indica cu den e prome kwartaal di e aña nan lo duna e fecha cu e frontera lo habri. E mandatario a indica cu nan no por duna e fecha concreto, pero el a remarca cu e ta kere cu esaki ta un di e ultimo prolongacionnan di e ciere.

El a splica cu nan ta warda e eleccionnan na Venezuela pasa. Ya asina nan ta mira cu ta bin mas trankilidad politicamente tambe y pues lo bolbe habri pa loke ta e vuelonan directo.

“Frontera maritimo ta habri, e ta bayendo bon, nos no tin ningun keho riba esey. E no a trece si e desaroyo economico cu nos a kere cu e lo a trece, pasobra esey tabata e peticion, pero e ta habri y e ta bayendo bon y esey ta duna mi e confiansa cu e apertura di frontera aereo pa vuelonan directo tambe lo bay bon,” prome minister a enfatisa.