Dia 1 di september ta e fecha cu constitucionalmente Gobierno di Aruba mester entrega su presupuesto 2020 na Parlamento di Aruba. Prome Minister Evelyn Wever-Croes a bisa cu nan no ta logra entrega e concepto di ley aki ainda.
E no por nenga cu e situacion financiero di pais Aruba ta dificil, y actualmente nan ta den e ultimo fase pa prepara e presupuesto 2020, cu mester produci un surplus.
“Nos no a cera e begroting ainda!” el a bisa. Kier men cu ainda nan no por yega na e surplus di 25 miyon cu mester yega na otro aña, di acuerdo cu e protocol cu Gobierno di Aruba a firma cu Hulanda, na luna di december ultimo.
Segun e prome mandatario, e asunto di por concipia e presupuesto di otro aña ta un asunto di deliberacion tur dia den seno di gobierno. Nan kier entrega e presupuesto mas pronto cu ta posibel, pero pa 1 di september –manera nos ley supremo ta stipula– ainda gobierno no lo ta cla cune. Pero si, a lo menos, nan kier entrega ‘algo’ pa e fecha aki. Nan kier anticipa algo pa mustra den cual direccion gobierno ta bayendo, el a bisa.
