Diabierna anochi Minister President, Sra. Evelyn Wever-Croes, a publica un video ariba e pagina oficial di Facebook di Gabinete Wever-Croes II caminda el a lesa e carta cu ta contesta e carta cu grupo di sindicato a entrega gobierno dia 2 di december unda cu un biaha mas ta pidi gobierno pa elimina e recorte salarial di 12.6% per dia 1 di december 2021.

Manera ta conoci pa algun tempo caba, un grupo di sindicato di Aruba a uni den e lucha pa elimina e recorte salarial mirando cu Fase a termina na luna di november y e posicion inicial pa loke ta trata e recorte tabata primeramente pa e 12.6% wordo hinca den un fondo pa asina Fase por a existi.

Dia 25 di november e sindicatonan a tene un manifestacion pasivo y a haci entrega di un manifiesto oficial na gobierno cu tabata consisti di dos punto primordial, uno ta pa elimina e 12.6% y dos ta cu na momento cu mester bin cambio of mester tuma algun decision, gobierno mester sinta na mesa di negociacion cu sindicatonan pa wak con nan por yega un caminda cu tur hende por biba cune.

A base di e manifiesto aki gobierno a yama e sindicatonan pa un reunion dia 1 di december 2021 caminda gobierno a propone na e sindicatonan pa forma un comision cu lo consisti di expertonan apunta pa gobierno y di miembronan apunta pa e sindicatonan. Durante e rueda di prensa di e sindicatonan di dia 2 di december, Sr. Edward Maduro, presidente di Sindicato SADA a indica cu e sindicatonan no a bay di acuerdo pa forma e comision aki y a manda un otro carta pa gobierno ariba dia 2 di december caminda nan a duna un ultimatum y tabata sperando un respuesta diabierna 3 di december pa 5or di atardi.

Minister President a contesta e carta di e sindicatonan den e video cu a wordo publica ariba e pagina oficial di Gabinete Wever-Croess II unda cu e ta bisa cu Aruba a atravesa momentonan hopi dificil desde prome momento cu COVID a yega Aruba. “Hopi hende, specialmente den sector priva a perde trabao, hopi hende tabata na riesgo di perde trabao, hopi hende a perde negoshi, hopi hende a perde tur cos, pero na e momento ey, danki na accion rapido di gobierno, cu determinacion nos a logra cu nos por a scapa y evita lo peor” el a indica.

Gobierno a haci un apelacion na e momento ey na empleadonan di sector publico y semi-publico pa entrega parti di nan entrada. Ya ta casi 21 luna cu a pandemia a yega Aruba y aworaki pais Aruba ta riba e caminda di recuperacion. “Pero nos no a yega ainda. Ainda tin hopi hende cu no a haya trabao, ainda tin hopi hende cu nan trabao ta core peliger, tin negoshinan cu ainda ta coriendo peliger y nos ta premira cu pa e aña aki, y sigur e prome mita di aña 2022 nos ta bay depende di sosten di likides di gobierno di Hulanda”, Minister President a bisa.

“E sosten di likides di Hulanda ta e unico forma cu Aruba por bay atravesa e lunanan nos dilanti y pa e motibo aki, gobierno di Aruba na e momento aki no por compromete su mes pa stop e recorte salarial di 12.6% e luna aki manera sindicatonan a pidi”, el a agrega.

El a señala cu e ta lamenta cu no tur sindicato a acepta e proposicion di gobierno, cu a wordo presenta durante e reunion cu e sindicatonan dia 1 di december pa forma un comision hunto, un comision consistiendo di miembronan di gobierno, miembronan apunta pa sindicato, pa hunto nan studia e situacion financiero di pais Aruba y basa ariba e situacion financiero bin cu un proposicion pa gobierno por usa como un punto di salida comun, di gobierno y sindicato, pa asina negocia cu Hulanda.

“Esey tabata nos proposicion, ban para hunto, ban dialoga, ban yega na un proposicion hunto pa nos por negocia cu Hulanda. Mi ta lamenta pues cu no ta tur a acepta e proposicion aki”, Minister President a expresa.

El a enfatisa cu gobierno di Aruba tin comprension pa e lucha sindical y nan tin comprension pa e sacrificio cu tur empleado a haci den e circunstancianan aki. Alabes el a urgi tur lider sindical, den nomber di gobierno di Aruba y den nomber di pueblo di Aruba, pa no organisa un paro general pero pa reconsidera y acepta e proposicion pa asina nan dialoga, yega na un punto di salida conhunto pa asina negocia cu Hulanda.

Por ultimo, Minister President a bisa: “Aruba ta den recuperacion aworaki, bienestar di hopi hende ta depende di e recuperacion aki, pa e motibo aki mi ta invita tur gremio, specialmente tur sindicato pa hunto nos traha pa logra e recuperacion aki pa Aruba y mi ta keda en espera, ohala di un contesta positivo di sindicatonan pa nos dialoga, pa nos yega na un punto di salida conhunto y pa nos negocia hunto cu Hulanda.”

Bon Dia Aruba a acerca presidente di SIMAR, Sra. Josephine Albertus, pa comentario ariba e respuesta di parti di gobierno y Sra. Albertus a informa cu e sindicatonan lo reuni awe mainta pa dialoga ariba e respuesta di gobierno y kico lo bira e siguiente pasonan pa e sindicato.