ORANJESTAD – Den oranan di mainta, tin personanan ta core na e caminda pa Linear Park, pa nan salud of pa training di condicion. Casi pa 7or, trahadonan ta cuminsa yega pa asina cuminsa cu nan trabou di dia, pero esaki ta causa un molestia pa esunnan cu ta core, y mas den caso di muhe.
Laura Medina a acerca Bon Dia Aruba reclamando di parti algun otro personanan femenino, cu tin keho cu e trahadonan ta keda molestia. “Mi ta compronde cu nan kier bisa bon dia manera educacion, anto mi ta contesta bek, pero nan ta cuminsa fluit, duna comentario inapropia, of keda wak bo y hari.”
Segun Medina, e no ta sinti confortabel pa pasa eynan, ya cu bo ta concentra den bo coremento y nan ta stroba di e manera ey. E ta agrega cu e hendenan homber mester ta enfoca riba nan trabou y no na ken ta cana. “Nan ta grita tur cos cu pasa nan dilanti. Pero e ta pio pa esunnan hoben, pa motibo cu mayoria di nan ta homber grandi di edad. E no ta manera. Homber mester por controla tin biaha, e no ta cu nos ta show off, e ta un luga di core y train.”
