E ley seco ta vigente durante eleccion otro siman, contrario impresion duna den cierto prensa.

Departamento di Legislacion y Asuntonan Huridico ta informa cu e e ley ta vigente entrante di diahuebs 21 di september 6or di atardi te diasabra 23 di september 6or di mainta. Gobierno a dicidi esaki y formalisa den un decreto riba 28 di augustus ultimo (No.1, DWJZ/1103/17).

Segun informacion di e departamento:

Durante vigencia di ley seco tur localidad cu tin permiso pa bende bebida alcoholico leve of fuerte mester ta cera, mientras cu ta prohibi pa bende, entrega of duna bebida alcoholico leve of fuerte cu ta den e localidadnan aki na publico, cu excepcion di e siguiente casonan:

  1. Tiendanan cu ta bende otro mercancianan banda di bebida alcoholico leve of fuerte (p.e. supermercadonan) por keda habri, bou condicion cu no ta permiti pa bende, entrega of duna bebida alcoholico leve of fuerte cu ta den e tiendanan aki.
  2. Hotelnan y luganan di alohamento (logement) por keda habri, bou condicion cu no ta permiti pa bende, entrega of duna bebida alcoholico leve of fuerte si no ta huespednan no residente di e hotel of luga di alohamento.
  3. Restaurantnan cu ta bende bebida alcoholico leve of fuerte por keda habri, bou condicion cu e bebida alcoholico leve of fuerte den e restautant no por ser bendi, entrega of duna, cu excepcion di restaurantnan den e edificio di Aeropuerto Internacional Reina Beatrix den e areanan unda bebida alcoholico leve of fuerte por ser bendi of entrega solamente na pasaheronan saliente of di transito.
  4. Refresquerianan cu ta bende bebida alcoholico leve por keda habri, bou condicion cu no ta permiti pa bende, entrega of duna e bebidanan alcoholico leve den e refresqueria.

En conexion cu esaki minister di Asuntonan General mediante e disposicion ministerial di 31 di augustus 2017, Nr. DWJZ No.1104/17, a prohibi tur tienda, localidad of luga cu no ta rekeri un permiso pa bende bebida alcoholico leve, pa bende, entrega y/of duna cualkier bebida alcoholico durante e vigencia di ley seco.

Prohibi zonido fuerte

Finalmente minister di Asuntonan General mediante e disposicion ministerial di 31 di augustus 2017, Nr. DWJZ No.1133/17, a prohibi uzo di instalacionnan di zonido ariba 22 di september 2017 di 6 or di mainta te 8 or di anochi den un straal di 50 meter di un stembureau, si ta pa haci anuncionan di cualkier forma relaciona cu eleccion of pa toca musica.