Lo no por introduci un Value Added Tax (Belasting op Toegevoegde Waarde; BTW) pa 2021 ni pa 2022. Asina Minister di Finanzas Xiomara Maduro a informa Bon Dia Aruba.

Manera ta conoci, IMF, esta Fondo Monetario Internacional den su ultimo analisis di Aruba, publica e siman aki, a urgi pa introduci e VAT mas pronto posibel pa asina amplia e base di belasting. E VAT no solamente lo yuda genera e entradanan di belasting necesario, segun IMF, pero tambe ta absorba e perdida di entrada cu a bin a traves di e reduccion di inkomstenbelasting (na inicio di 2021). Ademas, e VAT lo yuda e gruponan vulnerabel pa motibo cu e reparticion lo ta mas husto y e cobranza ta mas sigur.

E recomendacion pa cambia e sistema di belasting na Aruba di menos directo pa mas impuesto indirecto ta existi pa hopi tempo caba. Es mas, IMF a sugeri e introduccion di VAT varios aña pasa caba. E crisis financiero cu COVID-19 a produci sin embargo a empeora e situacion di Aruba y e necesidad pa genera entrada a bira mas urgente.

Esey ta motibo tambe pakico e landspakket di Hulanda pa Aruba, e condicion a base di cual Aruba a haya sosten di liquidez ta menciona specificamente e VAT. Segun e texto di e landspakket riba belasting, pa hisa entrada y simplifica e sistema ademas di hacie mas robusto, mester bin un revision completo di e structura fiscal, incluso e aspecto di inkomstenbelasting.

Mester tene e proposicionnan na cuenta, cu ta amplia e base di belasting, move di belasting directo pa indirecto y introduccion di un VAT/BTW di 12,5 porciento, conforme e recomendacion di e Fiscal Affairs Department, FAD, di IMF. Hulanda tambe ta kere cu e ABB, conforme e structura fiscal di Islanan BES tambe ta posibel. E medida aki ta dirigi na reduci substancialmente di pago di belasting y traspaso pa tercer partidonan, ademas cu ta limita e autoridad discrecionario y metemento administrativo di tanto ambtenaar como mandatarionan. Den e caso aki, Hulanda ta considera cu e paso aki lo controla e dunamento di por ehempel tax holidays y otro reduccion di belasting.

A base di revision y conseho, lo desaroya y implementa proposicionnan, teniendo cuenta cu e reglanan internacional di entre otro e Organizacion di Cooperacion y Desaroyo Economico, OECD. Segun e landspakket mester a determina e ‘plan van aanpak,’ esta e plan con pa ehecuta e revision di e structura fiscal y di belasting pa 1 di Maart ultimo. A base di e resultado lo formula e siguiente pasonan.

Pero Minister di Finanzas a informa cu por lo pronto no lo por introduci e VAT. Gobierno ta haciendo e calculonan necesario pa por introduci e sistema aki. Di momento cu tuma e decision pa un VAT of BTW, e lo tuma por lo menos 18 luna pa implementacion. Ademas prome cu implementa e VAT, mester tuma un aña di consientisacion pa publico. “Pues pa awor no ta bay tin BTW ni na 2021 y tampoco na 2022,” Minister Xiomara Maduro a bisa.