No obstante tur turbulencia, Marisol Lopez Tromp ta keda fungi como Minister di Desaroyo Teritorial, Infrastructura y Medio Ambiente, hasta sin ta forma parti di partido POR. Y e ta cla pa sigui e ilustra e casonan yamativo cu el a topa den su departamentonan diaranson awor durante e continuacion di e dos tanda di e reunion publico cu a cuminza, pero no a termina dia 31 di juli.

Manera ta conoci, a yama e reunion aki pa presenta un mocion di desconfianza contra e Minister en cuestion. Tabata su propio (ex) coleganan di partido POR y miembronan di e fraccion blauw, kendenan despues di desacuerdo cu e maneho di e Minister tabata cla pa tuma e paso pa retir’e. Pero, e reunion a keda na mita, despues cu drs. Lopez Tromp a cuminza ilustra un cantidad di casonan robez cu el a topa cune y como tal a bisa cu no sa pakico tin un mocion di desconfianza si e tabata haci su trabou debidamente. “Claro mi ta desea di tin claridad riba loke a keda pendiente,” tabata palabranan di e Minister.

Reunion Mocion Desconfianza

Ayera, durante un conferencia di prensa na Arashi, Minister Lopez Tromp a bisa cu e ta cla pa sigui cu e reunion y cu comunidad por spera cu e lo ta mes transparente. “Den e aspecto ey, nada a cambia. Si tabata pa mi, e reunion lo mester a sigui e mesun anochi, dia 31 di juli. Mi a planea cu e reunion lo a caba cu votacion y resultado.” E Minister a bisa cu e tabata anticipa un resultado, y tabata cla pa bolbe Hulanda pa sigui cu su compromisonan cu su yiu.

E anochi ey, sinembargo tabata e propio lider di fraccion di POR, Dellanire Maduro cu a pidi pa suspende e reunion pa studia documentonan di e dos reunionnan di mediacion. Y tabata durante e mesun oranan ey, Prome Minister Evelyn Wever Croes a dicidi pa tuma e encargo di mediacion.

“No obstante esey, trabounan a continua. Mi a keda traha.” Legalmente, e cartera a keda bou encargo di Marisol Lopez Tromp y Prome Minister tabata su reemplasante.

Expone casonan iregular

E suspension di e reunion y e hecho cu Lopez Tromp ainda ta Minister no a trece ningun cambio den su postura. Esta di kier ilustra tur e casonan robes cu el a topa den su departamentonan, e accionnan cu el a tuma y e motibo pakico e mester a tuma e pasonan. Y ironicamente, dos di e acusacionnan serio di partido POR contra su persona a keda evalua pa Huez cu a bay de acuerdo cu e postura di e Minister. Ta trata di e hecho cu el a laga pidi un surceance van betaling pa Serlimar y cu Fundacion Parke Nacional Aruba a dicidi pa limita trafico di ATV/UTV. Huez a duna Serlimar e suspension di pago na creditornan pa un aña y mey y tambe FPNA y Pais Aruba a haya razon den e caso cu Aruba Offroad Foundation a entama nan contra. Pues practicamente e argumentonan pakico POR literalmente a saca e Minister for di partido a cay afo, mirando cu e Minister a actua debidamente segun Corte.

Marisol Lopez Tromp ta contento cu a yama pa continuacion di e reunion, ta programa awor pa dia 2 di september. Y comunidad no mester kere cu pasobra a bin mediacion, lo no tin e mesun disertacion diaranson awor, cu mester tabatin dia 31 di juli durante e di dos tanda. Minister Lopez Tromp a sigura cu e lo ta totalmente transparente. “Mi por garantisa cu den e aspecto di trabou, nada a cambia. E transparencia cu mester tin pa Parlamento y comunidad di Aruba lo ta mescos, pasobra trabou a continua.”

Documentonan

Lider di fraccion di POR, Dellanire Maduro a expresa cu ainda nan lo kier mira documentonan prome cu continua cu e reunion, pero segun Lopez Tromp ta trata aki di documentonan cu el a pone na disposicion pa tur Parlamentario por a lesa dia 31 di juli. Tabata un cantidad di caso di iregularidad den e aparato publico, particularmente den e departamentonan cu ta resorta bou su cartera. Ta casonan cu el a topa. “Ma trece tambe documentonan cu mi a topa cune na mi bureau, situacionnan cu mi a encontra. Mi a trece documentonan pa mustra contratonan cu no a cera conforme ley di Comptabilidad.” Tambe a trece documentonan riba areglonan di huur di edificio y tambe documentonan riba personanan cu a haci actonan coruptivo of iregular den departamentonan y a haya pasonan disciplinario nan contra.

Pero e documentonan aki ta inclui nomber y datonan di hende y companianan, cu e Minister no a sconde, pero cu di mes no por bira publico, pero Parlamentarionan por a wak tur e informacion. “Lamentablemente algun Parlamentario no a tuma nan tempo, ni pa pasa door di e papelnan ni sikiera lesa algun parti. Tabatin otro Parlamentario cu si a bay studia e documentonan y pruebanan di locual mi a papia.” Segun Lopez Tromp, tur locual el a bisa ta basa riba documentonan y ta inclui casonan unda tin investigacion penal andando. “E documentonan aki lo bolbe Parlamento pa miembronan por wak.” Motibo pakico no por a haci tur e documentonan publico ta pasobra varios di nan ta forma parti di un investigacion penal, y den e caso aki, Parlamentario Alan Howell, cu ta un Polis di profesion, ta uno cu mester por compronde cu den un caso asina, no por hinca informacion asina den ambito publico tanten cu e investigacion no ta completo. Aki e Minister ta papia di tanto e caso Avestruz cu ta enfoca riba e actonan cu a sucede durante Gabinete Mike Eman II, unda hasta ex-Minister y actual Parlamentario Benny Sevinger ta parti di e investigacion, y e otro recien, Flamingo, unda fundado di POR y ex Minister Otmar Oduber ta den bista di Ministerio Publico. “P’esey mi ta haya straño cu Parlamentarionan ta bisa di no kier papia di casonan di corupcion, “ Lopez Tromp a comenta.

Tereno Arashi, Port City

Berdad e documentonan ta hopi, pasobra Marisol Lopez Tromp a bisa cu el a colecta tur papel, contrato y otro documenta cu el a topa cune cu no ta corecto. E ta kere cu esey ta motibo pa kico algun colega den Conseho di Minister a bay contra dje, pasobra a expone hendenan no solamente liga na POR, pero tambe por ehempel na MEP. Y esey e lo bay splica diaranson awor. “No ta pasobra mi a reanuda mi trabou, mi no ta bay bisa kico tur mi a topa.” Ademas, e Minister a bisa cu e tabatin mester di cooperacion di su coleganan Minister den e casonan iregular pero no a ricibi esaki, y lo ilustra e realidad aki tambe diaranson awor. E ta spera cu pa e reunion tambe e lo tin contestanan pa tur e preguntanan cu el a ricibi di Parlamentarionan riba otorgamento di tereno na Arashi, e progreso di e proyecto Port City, y riba e tereno di medio ambiente, entre otro.

Reunion Conseho di Minister no a continua

Marisol Lopez Tromp a bisa cu su bista no ta pa eleccion na 2021, sino cu e ta enfoca riba su trabou actual y tambe e reunion publico di otro siman unda e lo sigui duna un ilustracion di tur e iregularidadnan cu el a topa cune.

No ta kita afo cu Aruba awor ta den un realidad hopi straño unda cu tin un Minister, nombra pa un partido cu ya no ta miembro di e organizacion politico, ya cu a sak’e na juli. No a dun’e su retiro, manera tabata e intencion dia 31 di juli, ya cu e reunion no a continua. Pero locual ta mas curioso ta cu directiva di partido POR a entrega su retiro. Minister Bikker, kende no a duna un declaracion oficial, lo a laga sa di lo sali di politica ora cu su termino como Minister caba.

Mientrastanto, ayera lo mester tabatin un reunion di Conseho di Minister, pero pa un of otro motibo, tur e otro Ministernan, cu excepcion di Andin Bikker, a hala nan topiconan atras y reunion no a sigui. Entre otro lo mester a discuti e topico di e ‘gedoogbeleid’ pa piscamento cu harpun.

Nota di redaccion:

Nos a tuma nota di varios comentario encuanto e retiro di directiva di partido POR, sugiriendo cu esaki automaticamente ta implica cu lo no tin partido mas. Esey ta incorecto; e miembronan di e partido por tene un Asamblea General di Miembro (Algemene Ledenvergadering), y elegi un directiva nobo pa e persona huridico POR.