Ayera minister di Husticia, Andin Bikker a referi na e ultimo acontecimento, caminda piscadonan buscando e manera di gana nan pan, nan a perde riba lama.
Ta e caso ultimo di e dos piscadonan abordo di e boto “Rubia” cu ayera a haci un siman cu nan ta perdi, y te ainda no tin noticia positivo di nan paradero.
E mandatario a bisa cu constantemente e ta den contacto cu Kustwacht riba e caso aki. Ayera prome cu e conferencia di 10’or di mainta, e no tabatin mucho informacion. Pero minister a laga sa cu si tin cualkier novedad, e ta notifica esaki pa comunidad.
Aparato GPS
Mirando cu e casonan lamentabel di persona perdi riba lama ta bin sosode keto bay, e mandatario a bisa cu nan kier introduci e proyecto di un aparato of GPS. E decision aki a wordo tuma recientemente den conseho di minister a dicidi di bin cu un maneho, a base di conseho di Kustwacht, Centro Hadicurari y otro instancia concerni. Nan lo ta implementando e proyecto aki, unabes cu nan por haya un conseho di Kustwacht y instancianan concerni pa evalua cual ta e miho aparato teniendo na cuenta nos circunstancia y localisacion den Caribe.
“Mi ta kere cu e ta bay ta algo hopi innovativo pa e siguridad di nos piscadonan,” el a declara.
Nan kier introduci e aparato aki pa esnan cu no tin suficiente recurso pa tin acceso na dje. E ta un GPS personal cu ora bo ta bay pisca den boto of bo ta tirado di pisca, e aparato aki por yuda den e proceso di buskeda of rescate si bo ta confronta algun problema den lama.
E no ta un aparato costoso, sinembargo nan intencion ta pa e piscado humilde cu ta esun cu ta pone den riesgo nan bida por tin acceso na e aparato aki. Den caso di peliger riba lama nan por activa e aparato cu ta traha via satelite cu ta manda señal cu por yuda pa asina e team di rescate por localisa e persona perdi hopi rapido.
