No mester rabia, sino ripiti, busca y test pa Covid19; Epidemiologonan preocupa cu e falta di confianza pa e strategianan di Aruba

Si no tin confianza den maneho riba salud publico dificilmente por controla e transmision di un virus cu ta depende di comportacion di hende. Epidemiologonan prepara, Maribelle Tromp y Juancho Ridderstap ta observando e desaroyo di ultimo simannan, unda diariamente ta haya hopi caso di infeccion pero tambe a cuminza mira hospitalisacion cu hopi preocupacion.

Ambos tabata traha na Direccion di Salud Publico, pero awor ta den sector priva.

Segun Tromp, cu testmento so no ta controla e situacion. Locual mester wak ta na unda e problema di transmision ta, y esaki ta sosode pa medio di un investigacion epidemiologo. Asina so por tuma medida pa elimina e fuente di e transmision. Di e forma aki no mester bin lockdown. “Pero tur hende mester keda mantene nan mes si na regla di distanciamento social y higiena,” Tromp a enfatisa. Ademas, ta imperativo pa crea un barera di proteccion pa e gruponan vulnerabel.

Investiga

Un investigacion epidemiologo ta encera bay den busca di e virus, unda cu e ta na Aruba. E ta rekeri observa tur caso y esnan den cercania di personanan infecta. E punto di salida ta cu di e forma aki por calcula e incidencia, pues e cantidad di caso cu lo raporta denter di un periodo specifico; e prevalencia, cu ta e cantidad di caso den un periodo specifico den tempo; hospitalisacion, cu ta indica cuanto lo mester bay keda interna; morto. E datanan aki ta yuda crea modelonan epidemiologo pa anticipa unda, con largo y con hopi e transmision di Covid19 ta y lo ta.

“No ta dunando mucho informacion riba con ta mitiga e transmision. Den e fase aki di e epidemia, no mester keda conta cu hende ta keda nan cas y isola nan mes. Mester wak for di ken y/of unda e infeccion a tuma luga. Si informacion no ta yega na comunidad, y comunidad no ta scucha mas na e mensahenan di Gobierno, e ta indicativo cu no tin un confianza mas den e mensahe cu ta sali afo,” Tromp a señala.

Riba rednan social por ehempel, a sali di un caso con un pacient cu a haya resultado di su Covid test a dicidi pa bay oficina di su dokter di cas pa informa e assistent cu e ta positivo. Den presencia di mas hende y despues e señora a bay para warda bus, sin su mondkapje. “Esaki no ta cuestion di tin mal intencion, pero simplemente e ta cuestion cu e informacion debido, pa un of otro forma no a yega na e persona aki.”

Juancho Ridderstap ta comparti e pensamento cu no por cansa di ripiti, y si publico ya no ta scucha e mensahe for di e canalnan tradicional, mester busca otro forma. “No ta cuestion di rabia, pero di keda ripiti y ripiti,” Ridderstap a bisa. Esencial ta si cu e vocero di Gobierno, ken cu e por ta cu ta trece e informacion riba mitigacion, distancia social, mantene regla di higiena, uza mondkapje y si ta infecta, bay den isolacion, ta goza di confianza di comunidad. “Gobierno tabata laga diferente persona di Crisis Team splica e situacion, pero realidad ta cu den e circunstancia actual no mester perde pasenshi, y mester keda ripiti, ripiti, y splica na placa chikito pakico ta tuma decisionnan y pakico publico mester tuma paso.”

Man duro

Segun Ridderstap, e no ta keda na gusto di personanan ora nan ta mester bay den isolacion y cuarentena. “Isolacion y cuarentena ta obligatorio y Prome Minister mester enfatisa esaki,” Ridderstap a splica. “Bo tin cu bay den cuarentena y sinta den cas pa dos siman. Ami mes a haci’e. E no ta facil, pero mester cumpli cune. Eynan nos ta poco debil na Aruba.”

Ademas, Aruba a haya tempo pa crea mas colaboracion entre laboratorionan y tambe pa prepara plannan specifico si mester a haya un di dos ola, despues cu e isla a yega na cero caso di Covid registra,

Planea colaboracion

“Mester a unifica e laboratorionan pa tur hende ta riba un liña, pa loke ta test. E testnan mester ta aproba. Algun ta sali positivo y negativo sin cu tin claridad. E testnan mester ta hopi sensitivo, cu kizas ta produci cu ta sali positivo pero despues ta resulta cu e persona nunca tabatin e virus. Pero esey ta miho cu si drenta un resultado negativo, y esaki ta resulta di ta robes” Pasobra ora cu testnan ta asina sensitivo cu kisas nan ta capta hasta un otro coronavirus cu ta produci influenza, e persona ta bay den isolacion kisas innecesariamente, pero e no ta plama nada. Si e test mester sali negativo y e tin e virus, anto e ora ta crea siguransa falso. “E importancia ta pa gara tur hende, incluso esnan cu tin Covid. P’esey kier testnan di specificacion mas abou y sensitividad hopi halto, di por lo menos 99%. Mester habri e trechter pa gara tur hende cu e virus.”

Contact tracing

Ridderstap ta bisa cu e hecho cu Gobierno ta bisa henter ora cu a pesar cu e casonan ta aumenta, cu toch tin un capacidad na hospital pa atende casonan mas severo, mester ta basa riba contact tracing, esta cu nan tin informacion cu comunidad no tin. Si tin un proceso di contact tracing agresivo tumando luga, anto Salud Publico tin e datonan cu ta duna un bista riba unda, ken y ki ora tin transmision. Di e forma aki tin un bista cla di e grado di transmision y por bin mesora cu medidanan di mitigacion. “Locual ta lamentable ta cu no ta duna suficiente dato anonimo pa asina publico por compronde kico ta pasando na Aruba, pa asina sa si e transmision ta tur caminda of e ta concentra den cierto areanan.” Si esey no ta e caso, anto tanto Ridderstap como Tromp ta bisa cu ta keda cana tras di e hechonan.

Test tur caminda

Contact tracing ta esencial, pasobra asina por haci testing segun un vision, cu un rumbo, Ridderstap a bisa. “Si ta test sin dato specifico, anto lo mester sigui test na cantidad. Den un caso asina, ami lo bisa e ora pa sigui test, ami lo no stop. Puntonan critico den nos sistema, testing a bira obligatorio. Ami lo test tur hende cu ta drenta den hospital, esnan cu ta traha na SABA pa proteha esnan cu ta vulnerabel. Si ta berdad cu a perde control riba e forma con e transmision ta bayendo, anto. Ami no ta mira e datonan completo, pero si ta asina, mester proteha esnan cu ta cay den e grupo risico. Tanto Ridderstap como Tromp ta admiti cu nan no ta haya tur informacion y como tal, nan por djis conseha basa riba nan propio observacion y conocemento di e materia.

Proteha vulnerabel sin lubida riba nan

E maneho mester ta dirigi pa proteha esnan vulnerabel. Den otro palabra si un hoben ta sali, y ta keda infecta y no ta core hopi risico, esaki por conduci na inmunidad di grupo. Pero si e ta biba cu su mayornan, anto e ora e asunto ta bira mas complica. Den e caso ey, e yiu mester sigui tur exigencia di hygiena pa proteha mayornan. Esey ta deber di yiu cu ta biba na cas. “Pero si nan no ta biba cu mayornan, e por keda cu e grupo di hende hoben y por hasta bishita mayornan for di un distancia.” Di e forma aki, ta permiti e grupo di hende grandi bira completamente isola di e virus.

Pero Juancho Ridderstap ta keda insisti cu mester kibra cu mitonan. Berdad hobennan cu condicion di salud malo tambe ta core risico grandi, pero esnan di mas edad ta e grupo identifica di ta den e grupo mas grandi di risico. Sinembargo, ta e grupo di hendenan di edad cu tambe lo sufri si nan no tin contacto cu nan famia. Como tal, mester keda mantene e ritual di higiena, uza mondkapje y por hasta bay bishita mayornan kedando na un distancia di 3 meter por lo menos, pa asina mayornan of hendenan grandi no cay den depresion.