Parlamentario Shailiny Tromp-Lee (MEP) a elogia e trabou boluntario realisa den diferente scol den cuadro di Aruba Doet. Pero el a laga sa cu sin embargo e accion aki a mustra otro cara di e situacion di nos scolnan. “Hopi di nos scolnan ta den un estado hopi deplorabel.”
E ta haya importante pa reactiva e task force cu antes tabata existi pa tende e tipo di necesidad aki. Te hasta aloca fondo si ta necesario pa asina atende di un forma structural cu e mantencion di nos infrastructura escolar.
Parlamentario Tromp-Lee ta kere cu gobierno ta esun prome pa yama pa duna e asistencia y yudansa necesario riba tereno deportivo y fundacion, cu ta traha riba area social y fundamentalmente nos scolnan.
E ta haya cu nos no mester tapa wowo ni tapa solo cu un dede, pero si nos por realisa e necesidad grandi cu tin pa loke ta trata mantencion di diferente facilidad y den diferente area. El a referi specificamente na scolnan ya cu mayoria di nan a participa den Aruba Doet, pero tambe centro di barionan y fundacion social indicando e necesidad grandi cu tin pa nan mes structuralmente por mantene nan facilidad.
Den pasado tabata existi un task force. E parlamentario ta kere cu esaki ta un caminda cu nan por sondea e posibilidad pa haya e atencion si e task force aki ta activo. Pero si no ta activo, nan mester percura pa lant’e bek y amplia e tarea cu nan ta keda encarga cu ne. Mas cu 4 mil boluntario tabata activo fin di siman ultimo, y parlamentario Tromp-Lee ta kere cu mester haci e trabou aki mas facil y placentero pa nan.
