Gobierno di Reino, cu voto mayoritario Hulandes, a dicidi cu pa di dos trimester di 2022 gobierno di Aruba no ta haya sosten di liquidez. Esaki despues cu pa e promer trimester caba Aruba a haya solamente 12 miyon florin, indicando un diferencia di opinion tocante e necesidad real di liquidez.

Manera Fitch Ratings a mustra den su evaluacion di Aruba cu a keda publica e siman aki, Aruba lo bay financia su deficit completo pa aña 2022 via prestamo riba mercado local. Nan aparentemente tabata na altura caba di e decision Hulandes cu Aruba no lo haya mas sosten di liquidez pa e segundo trimester, y muy probablemente tampoco pa resto di aña. E concesion cu Hulanda tabata dispuesto di haci tabata e postergacion cu 18 luna di e momento di maduracion di e placa fia di Hulanda, te awor sin interes, pa bayendo final di 2023 negocia e terminonan di conversion di e prestamonan te awor. Aparentemente parti di e debe adquiri den ultimo añanan cu Hulanda lo por keda den forma di donacion, mientras e resto ta bira un prestamo cu interes abao. Fitch ta indica cu esey lo depende di e manera con gobierno di Aruba maneha nan finanzas na 2022 y 2023. Fitch ta menciona cu “voluntad di Hulandesnan pa extende apoyo financiero despues di 2022 ta insigur, specialmente si gobierno ta faya den yega na un surplus sostenible general den presupuesto.”

Ta parce cu tin diferencia di opinion con ta maneha e recursonan cu lo ta bay ta disponible den e proximo añanan. CAft a duna caba un preludio di esaki den su evaluacion di presupuesto 2022 y e presupuesto multi-anual acompañante, unda ta anticipa un aumento grandi di ingreso for di impuesto indirecto, procedente di e introduccion di e BTW entrante januari 2023. Sin embargo, a pesar di e extra grandi aki, cu Fitch ta calcula na por lo menos 3% di GDP, ainda lo keda alrededor di 0,5% di deficit, mientras segun gobierno na 2023 lo tin un deficit ainda di Afl. 109 miyon, alrededor di 2% di GDP. Den e mesun evaluacion CAft ta indica como punto di salida un surplus di 1% di GDP pa 2023 y e siguientenan. Ta di supone cu gobierno Hulandes ta opina igual cu CAft encuanto e necesidad di por cuminza baha e debe grandi di nos pais na 2023 caba.

Pero, gobierno di Aruba ta pone den su proyeccion multi-anual cu e idea ta pa bay gasta mas, entre otro na bienes & servico, y na gasto di personal… Compara cu 2021, na gasto di personal tin pensa di gasta Afl. 28 miyon mas, y na bienes & servicio Afl. 31 miyon. Es decir, ta haci un asalto grandi riba cartera di ciudadano y empresa por medio di introduccion di BTW, pero ni sikiera e ciudadano por mira, como banda positivo, cu gobierno ta corta su propio gasto, al contrario.

Den e contexto aki ta bira mas comprensible e observacion di Fitch menciona anteriormente, cu gobierno di Aruba lo financia henter su necesidad financiero pa 2022 cu prestamo riba mercado local. Esey probablemente lo ta posible, mirando e exceso di liquidez cu a haci cu Banco Central a hisa e porcentahe di reserva cu e banconan comercial mester mantene, pa por abserbe parti di e liquidez aki. E desbentaha ta cu e bononan di gobierno di Aruba lo bay haya un interes comercial, y esey lo aumenta e suma total cu mester bay paga na interes.

Contemplando e desaroyo aki den un contexto mas amplio, mester observa cu tin mas diferencia di opinion entre gobierno di Aruba y esun di Hulanda, cu no ta solamente tocante e necesidad di apoyo di liquidez. E tema ta aparentemente con ta sigui cu henter e trayecto di maneho financiero den e proximo añanan, si cada punto di menor importancia ta bira un bataya completo. Esaki por ehemplo tabata e caso di e 12,6% di recorte salarial, cu gobierno di Aruba a hinca caba den presupuesto, pa seguidamente hiba un pleito cu Hulanda pa permiti esaki, y bira ‘heroe local’ si acaso logra convence Hulanda. Y si no logra, e figura di ‘scape goat’ ta cay pa parti di Hulanda… Sublime politica local, pero den e ambito di Reino e cuchiu aki no ta corta nada.

Preocupante ta cu mester cana e caminda ainda pa yega na aprobacion di e leynan di supervision financiero y di institucion di COHO. Nos mester exclui un tipo di sabotahe den parlamento, manera a sucede algun aña atras cu adaptacion di e ley di supervision local? Ta di spera cu no, pasobra esey por dificulta eventual legislacion di consenso. Sin embargo, cu gusta of no, Reino den su tarea di vigila bienestar di tur ciudadano Hulandes, tin e obligacion pa cuida bon gobernacion financiero tambe y pa esey ta conta cu otro instrumento cu no tin mester consenso di ningun tipo. E mero hecho cu Fitch den su informe na varios ocasion ta enfatiza e necesidad di bon relacion cu Hulanda, ya ta mustra riba e realidad cu, sin e apoyo y garantia Hulandes, Aruba lo no por mantene su rating di ‘BB’, cu segun e normanan, cu Fitch a expone, nos no merece, pero pa cara di Hulanda nos t’ey. Nos mes por, sin bay pa ‘junk status’…?