Desde 2017, Gobierno di Aruba a tuma un decision tocante uso di plastic cu finalmente, ayera 1 di juli 2020 a drenta na vigor, cu e fin di haci un impacto grandi pa medio ambiente y proteccion di flora y fauna, cu ta adheri na Metanan Sostenibel (SDG’s) di Nacionnan Uni.

Na november di 2019 a keda conoci e implementacion di e ley di prohibicion di articulonan di plastic di un solo uso, como tambe pa Styrofoam y Oxybenzone.

E ley aki ta duna luga pa prohibi e uso di e productonan mas basico cu ta perhudica den gran escala e medio ambiente, manera saco, cups, forki di plastic, tayo, styrofoam box, straw di plastic, entre otro.

Ta bon pa cuminsa papia tocante reduci, reusa y recicla, aspectonan cu tin relacion cu economia circular y cu ta basa na e principio di ‘cera ciclo di bida’ di e productonan; pa produci bienes y servicio cu na su bes ta reduci e consumo y desperdicio di materia prima, awa y energia.

Tumando como ehemplo e modelo circular di naturalesa, economia circular ta un sistema pa probecha e recursonan, den cual desperdicio ta bira recurso. Tur material bio-degradabel ta bay back den naturalesa y esunnan cu no por lo reutilisa, reusa cierto desperdicio of partinan cu ainda por funciona pa elabora productonan nobo. Tambe e productonan mas deteriora por haya un ‘second chance’, como tambe probecha di esunnan cu no por recicla.

Si cuminsa pone den practica e principionan aki lo haya un cantidad di beneficionan tanto pa medio ambiente como pa sociedad, ya cu economia circular tambe ta considera e punto di inclusion social. Algun di e beneficionan ta:

  • Disminui e uso di recursonan, reduci e produccion di desperdicio y limita e consumo di energia.
  • Economia circular ta contribui pa crea rikesa y trabou.
  • Ta permiti pa haya un bentaha den competencia pa loke ta trata globalisacion, ya cu ta disminui e dependencia riba algun suministro externo y tambe incierto.
  • Ta habri e perspectiva pa un crecemento sostenibel y duradero.

Tin biaha cu hende no ta compronde pakico tin cu actua mirando e economia circular den futuro. E rason ta cu sociedad tin cu cuminsa siña cu e modelo economico actual tin un marca ecologico cu no ta sostenibel mas. Kiermen e demanda actual di recursonan natural di e poblacion mundial ta mayor cu loke e mesun tera por produci den henter un aña.

E pregunta ta, si economia circular tin asina tanto beneficio, dicon no a wordo implanta di un manera stabiel na tur pais? Si nos ta papia di economia sostenibel, e contesta ta cu ta existi empresanan cu no ta haya informacion corecto, cu no tin confiansa y capacidad pa implementa e tipo di economia aki. Y e sistema financiero no ta ofrece inversionnan pa un modelo di gestion di innovacion, ya cu nan ta considera cu tin riesgo y complicacion. Ta p’esey di e forma aki, e economia ta sigui ‘blokea’.

Algun compania a cuminsa pone den practica e sistema aki y nan ta comprobando cu e reutilisacion di recursonan ta resulta hopi mas productivo cu cuminsa fabrica desde cero. Como consecuencia, e prijsnan di produccion ta reduci di manera cu e prijs di benta tambe por baha, loke ta beneficia e consumidor, no solamente den e parti economico sino tambe den e parti social y di medio ambiente.

Di otro banda, e habito di consumo tradicional tambe ta obstaculisa e desaroyo di productonan y servicionan nobo. Ademas cu e politica no ta mustra un transicion specifico, aunke na Aruba ya a cuminsa papia di esaki como un modelo economico nobo cu por yuda lanta e economia golpia pa e crisis di Covid-19 y asina no depende di turismo so.

Pa finalisa, e productonan cu nos ta tira den bari di sushi nos mes por percura pa nan por haya un bida util. Esey ta parce imposibel, pero den realidad e unico cos cu nos tin cu haci ta pone un tiki mas di boluntad. E sociedad di usa y tira afo ta un sistema inhusto na tur nivel, esey ta contamina e planeta y na mesun tempo ta destrui comunidadnan.