Minister di Cultura Xiomara Maduro a delanta mas cu seis luna prome cu ta wordo celebra yegada di Sinterklaas pa anuncia algun decision cu ta concerni na su ayudante.

E biaha e figura di Zwarte Piet cu a bira uno masha controversial durante e ultimo añanan lo cambia di color. Principalmente e aña aki cu grupo anti racismo y discriminacion a lanta den henter mundo.

El a bisa cu no mester desconoce cu e celebracion aki tin un ‘tinte discriminatorio cune.” Pero no mester kita di otro banda cu e ta un fiesta di mucha. Nan no ta bay prohibi e fiesta aki, pero si e ayudante di Sinterklaas no lo ta mas Zwarte Piet, sino cu e ta bira di diferente color of color natural di e persona cu ta asumi e rol aki. E ta kere cu pa medio di e decision aki no mester yega na manifestacionnan pa bay contra un fiesta di muchanan.

E mandatario a bay den historia riba e origen di e celebracion aki cu den transcurso di aña a bira un tradicion na Aruba tambe. Na Aruba -segun e minister di Cultura- e cambio aki ta nifica cu bo ta celebra na bo manera, pero kedando den esencia di e celebracion aki. Sinterklaas tin su ayudante y su ayudante por tin cualkier color. “Pasobra tur hende tin diferente color,” el a bisa.

E mandatario ta haya cu no tin pakico cu e ayudante mester ta full preto. E por ta di color, y esey no kiermen –segun minister- cu bo ta discrimina un otro hende si e ta gel, berde, cora, etc… E ta haya cu miho lo ta si tur hende lo ta, manera nos ta, como ayudante di Sinterklaas. E idea ta cu esaki lo ta un fiesta alegre pa e muchanan. Un fiesta cu nos ta comparti regalo cu otro. E ta haya cu esey ta esencia di e fiesta aki.

“Niun momento e ta pa discrimina,” el a bisa. Pero e mandatario no ta desconoce cu den tempo a surgi e sentimento aki, y mas cu claro como gobierno nan tin atencion pa esey. Ya cu nan no ta bay fomenta celebracion den cual lo tin hendenan cu ta sinti nan mes discrimina. Sinterklaas por bin cu Piet pero e Piet aki mester ta sea di color of e Piet por ta na nos color natural, manera nos ta.

Yegada di Sinterklaas

Otro cambio lo tin haci e aña aki cu e yegada di Sinterklaas. Tur aña Sinterklaas ta wordo ricibi masalmente, pero e aña aki e ta bay cambia debi na Covid. E situacion aki a trece cune cu no por tin aglomeracion, locual ta dificultad e yega di Sinterklaas.

Ya a caba e mandatario di cultura a anuncia cu no por tin e parada manera custumbra, y mester cuminsa pensa riba otro opcionnan pa tog purba keda celebr’e di e forma tradicional. E mandatario a uza su custumbra slogan ‘cultura bo tin cu bib’e’ y nos mester warda cu seguramente Sinterklaas lo yega Aruba, compaña cu su pietnan di un of otro manera. Y despues pa e celebracion tuma luga, manera tradicional.

Cu e decisionnan aki gobierno ta respeta e hecho cu e celebracion aki ta un tradicion di hopi tempo. Pero nos por mira tambe cu den e tradicion aki a conoce cambio. Nan no por bisa pa bay stop full e celebracion di Sinterklaas, pero si pa nan no fomenta discriminacion.