Ayera den oranan di merdia a tuma luga un reunion di Sindicato di Polis Aruba (SPA) na Club POVA, unda nan a informa cu despues di un reunion cu secretario di Estado Alexandra van Huffelen, a informa nan y otro sindicato cu no ta bay elimina e medida di recorte di salario di 12.6%.

Despues di e declaracionnan di secretario di Estado, presidente di sindicato SPA, Robby Solognier a duna di conoce cu for di 12or di merdia di ayera cuerpo policial completo a bay plat te 2or di atardi. Esaki segun Solognier a menciona, ta pa nan miembronan mustra nan mal contento. “Nos a purba di tur sorto di forma, di splica, pidi. Aworaki bay djis kita nos placa y nos mester keda keto riba dje. Nos no ta keda keto y nos a purba hasta di trece esaki dilanti na Sra. Van Huffelen, pero nos a ripara cu nos no ta yega ”, Solognier a bisa.

Di mesun forma, el a menciona cu pa loke ta trata e Parada Nacional cu Gobierno di Aruba conhuntamente cu Departamento di Cultura ta organisando, nan no kier bay traha y cu nan tin pendiente un otro combersacion ainda. Pero e si a sigura cu “cuerpo policial ta full contra y no kier bay traha na e parada”, pa motibo cu “si no tin placa pa paga nos – ministernan por bin cu yen historia – pero si bo no tin pa duna nos nos placa back, mi ta kere cu na e momento aki no tin placa tampoco pa un parada”, el a finalisa.

Di mesun manera, algun miembro di Cuerpo di Aduana ayera mainta tambe a dicidi di cuminsa tuma nan oranan liber pa hustifica e recorte di salario di 12.6%, unda cu algun areanan no tabata trahando completo e dia di ayera.

Presidente di Sindicato di Aduana (SADA), Edward Maduro a bisa cu nan lo sigui cu e instruccion di tuma nan oranan cu no ta wordo paga. Cu a haci esaki un manera responsabel unda cu no a afecta algun departamentonan, segun loke Maduro a señala na e website local 24ora.

Reaccion di minister Dangui Oduber
 Durante conferencia di prensa pa trek lot pa e Parada Nacional, minister di Turismo, Dangui Oduber a duna comentario tocante e accion di polis. “Mi ta kere nos como gobierno tin comprension pa nan, nos tambe ta buscando tur manera con pa nan por haya e 12.6 porciento back. Pero mi ta kere nan tambe mester tin comprension cu e musiconan, e entertainternan cu pa casi dos aña tabata biba riba cero porciento salario. Nan no tabatin entrada pa dos aña. Y di e forma aki nos a busca un manera con pa nan tambe por haya un break despues cu nan tambe tabata biba riba cero porciento.”