Relaciona cu e notificacion cu gobierno di Aruba a ricibi di UNHCR cu ta e comision di Nacionnan Uni cu ta trata cu e tema di refugiado, prome minister Evelyn Wever-Croes a expresa con serio y delicado e tema aki referiendo na e situacion di Venezuela.
Pasobra ta trata di hendenan cu ta pasa hamber den un extremo hopi halto. Falta di cuminda, falta di remedi entre otro ta loke ta pone un pueblo dicidi di sali di su pais. “Con nos por atende cu e situacion aki? Como ser humano nos no kier pa e cos aki pasa cu un di nos hendenan, cu nos famia. Nos tur conoce hende cu ta biba na Venezuela, sea ta amigo of famia. Den un situacion asina delicado y doloroso, lo ultimo cu nos por haci ta spin e situacion aki den un direccion pa gana un of otro punto politico of score di un of otro manera”, prome minister a bisa.
E mandatario ta referi aki na e speculacionnan cu tawata tin cu si Aruba ta bay habri porta pa 10 mil refugiado y si e minister ta cla pa bay ministerraad cu esaki. Pa cua motibo prome minister a haci un apelacion riba henter nos comunidad pa nos tur tuma e tema aki cu hopi sensates. “Gobierno aki ta enfrentando hopi reto innecesario cu nos a hereda for di e gobierno iresponsabel anterior. Sinembargo nos ta atendiendo nan. Nos no ta core pa nan. Pero speculacionnan asina ta dificulta cosnan.” Prome minister a menciona cu minister di husticia Andin Bikker a refiri na 24ora. com cu na un manera hopi iresponsabel ta disinforma pueblo pa crea panico innecesario den pueblo.
Prome minister ta lamenta cu e medio di comunicacion aki a inventa ful un noticia falso cu mal intencion. Pasobra esaki no ta algo cu mester haci wega cu n’e. “Nos no kier pa un crisis humanitario cuminsa na Venezuela pasobra esaki lo afecta nos hopi severamente. Personalmente ami no ta gusta hunga cu karma y mi ta haci un apelacion pa comunidad henter tuma e tema aki cu hopi delicadesa y responsabel. E Premier a referi na un proyecto hopi interesante cu Union Europeo ta trahando riba dje.
Esaki ta un proyecto pa bin cu reglanan pa sanciona noticianan falso (Fake news). Pasobra ta esakinan ta afecta e stabilidad di un comunidad. Gobierno a busca e informacion di esaki pa asina Aruba tambe por conecta riba e mesun circuito cu Union Europeo pa loke ta trata noticianan falso.
Prome minister WeverCroes ta bisa cu den un situacion asina delicado cu ta trata di bida di hende, anto riba dje gobierno mester atende cu noticianan falso pa desinforma un pueblo pa crea panico cu mal intencion, ta haci e trabou hopi mas dificil. “E situacion ta hopi delicado, y nos mester ta hopi responsabel. Y esunnan manera e medio di comunicacion menciona cu ta bira un noticia pa causa sensacion contra gobierno, no por ta hendenan cu ta stima Aruba. Mi apelacion na henter Aruba ta, abo si cu ta stima Aruba, no cay den e cosnan aki. Yuda gobierno y uza tur energia y tempo pa hiba nos pais padilanti. Di e manera aki nos ta yuda nos mes pa asina nos por yuda nos prohimo”.
