ORANJESTAD – E Conseho di Minister di Reino a aproba e geschillenregeling cu pa hopi añanan ta riba mesa unda specialmente e islanan Caribense (Aruba, Corsou, St. Maarten) tabata pidi. Sinembargo e Conseho no a acorda e proposicion recien di e islanan pero esun di minister Hulandes, Ronald Plasterk.
E minister di Asuntonan di Reino a divulga esaki ayera. E proposicion ta cu den conflictonan entre paisnan den Reino, Raad van State (e organo na Hulanda, cu ta manera Raad van Advies aki na Aruba) ta duna un conseho unda cu Conseho di Minister di Reino y e paisnan mester tene cuenta cu e conseho aki. Pues no por pone esaki un banda facilmente.
E islanan Caribense den Reino a prefera cu e geschillenregeling (areglo di conflicto) tabata encera cu Hoge Raad (e sistema hudicial mas halto) lo tuma decision den caso di conflicto. Awor cu aprobacion di Conseho di Minister di Reino minister Plasterk a manda e proposicion di ley pa Raad van State pa nan duna un conseho. E proposicion ta encera articulo 12a di e Statuut di Reino (constitucion di Reino) pa asina yega na e areglo. E contenido di e ley aki y e conseho di Raad van Advies lo bira publico momento cu ta entrega esaki na parlamento Hulandes (Tweede Kamer).
Excepcion
Den e ley proponi ta para cu momento cu un di e paisnan den Reino tin un problema cu un decision tuma den e Conseho di Minister di Reino, lo pidi un conseho di Raad van State. A base di esaki e Conseho despues lo reconsidera e decision y tuma un decision di nobo. E conseho no ta algo leve, minister Plasterk a indica na Ret Karibense den un entrevista ayera. Sinembargo e conseho no ta mara e Conseho tampoco. Y tin cierto excepcionnan. Manera ora e presidente di e Conseho (esta e prome minister di Hulanda) ta haya cu no por tarda cu e decision pa motibo di interes importante di Reino. E minister ta duna ehempel decisionnan cu ta trata siguridad. Un otro excepcion ta pa decisionnan riba asuntonan cu ya caba ta cay bou di Kroonberoep (unda por apela), e areglo nobo tampoco ta conta.
Tambe asuntonan sea leynan di Reino unda e Conseho di Minister di Reino ya a tuma un decision caba y Raad van State a duna conseho, no ta cay bou di e geschillenregeling. E diferencia entre e proposicion di minister Plasterk y esunnan cu a bin for di e islanan Caribense, manera e proposicion di Aruba (Yrausquin y Herdé), tambe ta cu e areglo awor ta conta pa tur conflicto. Pues no solamente pa conflictonan huridico cual e islanan a propone.
Pues por uza e areglo pa tur sorto di conflicto, asina e minister Hulandes ta splica. Finalmente e ta bisa cu e no ta kere cu lo por finalisa e asunto di geschillenregeling prome cu eleccion na Hulanda. Como cu Raad van State mester su tempo pa analisa y despues bay bek Conseho di Reino pa despues entrega na Tweede Kamer, asina minister Plasterk ta bisa.
