(AP) – Negociantenan cu tabata trahando riba un tratado pa atende e crisis global di polucion di plastic pa un siman na Sur Korea no lo yega un acuerdo y tin plan di sigui cu e dialogo proximo aña.
Nan a yega un ‘impasse’ tocante si e tratado mester reduci e plastic total riba mundo tera y pone control global y legal riba kimiconan toxico usa pa traha plastic.
E negociacionnan na Busan, Sur Korea, mester a ta e di 5 y ultimo ronda pa produci e prome tratado cu ta carga peso legal riba contaminacion di plastic, incluyendo den lama, pa fin di aña 2024. Sinembargo cu tempo cabando riba dialuna, e negociantenan a keda di acuerdo pa caba e dialogo proximo aña. Te ainda no tin plan firme.
Mas di 100 pais kier pa e tratado pone limite riba produccion ademas di trata limpiesa y reciclahe, y varios a bisa cu esaki ta esencial pa atende e kimiconan di preocupacion. Sinembargo pa algun pais cu ta produci plastic, petroleo y gas, esaki ta crusa un linea cora.
Pa cualkier proposicion por drenta e tratado, tur nacion mester acepta esaki. Algun pais a busca cambio den e proceso pa asina decisionnan por haci den voto si no yega un consenso y e proceso aki a keda paralisa. India, Saudi Arabia, Iran, Kuwait y otronan tabata den oposicion pa cambia esaki, argumentando cu consenso ta vital pa un tratado efectivo y inclusivo.
Riba diadomingo, e ultimo dialogo riba schedule, e tratado te ainda tabatin varios opcion pa seccionnan clave. Algun delegado y organisacoinnan ambiental a bisa cu esaki a bira demasiado level, incluyendo negociantenan di Africa cu a bisa cu nan ta prefera bay for di Busan sin un tratado cu bay cas cu un tratado debil.
Tur aña, mundo ta produci mas di 400 miyon ton di plastic nobo. Produccion di plastic por aumenta cu 70% pa aña 2040 si no tin cambio den politica.
