Maske ya caba tin un proposicion riba mesa pa update e advocatenverordening, e coalicion di gabinete Wever-Croes I no a pone enfoke riba pas’e den parlamento. Ordo di abogado alabes a pidi atencion urgente pa e circunstancianan di detencion na e wardanan di polis y pa haci acceso di abogadonan na nan cliente mas facil ora nan ta deteni.

Asina deken di Ordo di Abogado di Aruba a bisa diabierna pasa den un conferencia di prensa. E conferencia tabata despues cu Ordo di Abogado a sinta cu formador Evelyn Wever-Croes. Deken Dirk Ormel a indica cu e minister di husticia demisionario actual, esta Andin Bikker, a bisa cu a pone prioridad riba otro trayectonan legislativo, incluyendo e actualisacion di e Codigo Civil, cual parcialmente ainda mester tuma efecto. Pues pa e rason ey no tabata posibel pa pasa e advocatenverordening nobo.

E advocatenverordening ta data di 1959, un tempo unda tabatin al menos cu 10 abogado na Aruba, compara cu awendia su rond di 115 abogado.

Ordo di abogado ya caba a mira e advocatenverordening nobo y tabata cla pa su implementacion, pero esaki no a pasa te ainda y pa e rason ey a pidi formador pa por tuma e paso di implementa esaki ora forma un gobierno nobo.

Ordo di abogado ta haya e actualisacion di e ley importante pasobra e lo haci miembresia na ordo di abogado automatico pa tur abogado. “Aworaki nos tin 90 miembro, mientras tin alrededor di 115 abogado”, Ormel a bisa.

Banda di esaki, cu e advocatenverordening nobo ordo di abogado lo haya un autoridad pa traha reglanan pa tur abogado. Mediante e poderacion aki ordo lo por regla mas formalmente entre otro estudio di personanan cu ta siguiendo e trayecto pa bira abogado. Ordo di Abogado kier pa un abogado stagiaire mester sigui un estudio ultimo despues cu el a caba su stage, algo cu regla caba den e proposicion cu tin na mesa. “E ora ey e exigencianan pa bira abogado ta bira mas pa nos, pero si e calidad di nos trabao por hisa.”

‘Mester tuma accion pa mehora celnan na warda di polis y pa abogado tin acceso na cliente’
 Banda di esaki, a combersa cu formador tocante e estado di e celnan di detencion na wardanan di polis. “E situacion na e celnan di detencion di wardanan di polis no ta den e miho estado. Bo por hasta bisa cu e ta deplorabel. Na mes momento abogadonan casi no tin acceso na nan clientenan ora nan ta cera den e celnan. Nos ta haya importante pa esakinan wordo atendi”, Ormel a bisa.

Finalmente a pone atencion riba e concepto di concordancia entre leynan den Reino, cual ta algo cu ta prescribi den Statuut di Reino. Ormel a splica cu gobiernonan di e paisnan den Reino no ta exigi pa sigui otro nan leynan den e manera con nan ta implementa nan propio leynan, pero si Ordo di Abogado ta haya cu por pone un seccion den e splicacion di un ley (memorie van toelichting) dedica na splica si a dicidi pa concorda cu otro leynan den Reino of no, pa asina e ta cla ora esaki ta pasa.