Gobierno a anuncia siman pasa e cambio di maneho di ley di salario mínimo, den cual a dicidi di introduci un suma di salario pa esnan cu ta traha 45 ora envez di 40 pa siman. A anuncia esaki bao di e nomber di un salario minimo pa ora. Laga nos cuminza cu bisa cu esaki ta un deseo di hopi aña caba y ta bon cu finalmente a tuma e decision aki cu ta faborable pa esnan cu te awe tabata haya un salriao minimo trahando 45 ora mientras e pago pa luna tabata mes halto cu pa un persona cu ta traha 40 ora pa siman. Asina un persona den e categoria aki tabata traha mas di 20 ora pa luna mas y no tabata haya compensacion pa esaki.

Loke a introduci awor ta un salario minimo pa 45 ora, banda di esun existente pa 40 ora. E calculacion di e salario pa ora a base di e salario minimo pa 40 ora ta sirbi como base pa e salario minimo pa 45 ora. Di e manera aki lo tin entrante januari 2025 un salario minimo di Afl. 2007,05 pa 40 ora y Afl. 2257,93 pa 45 ora. Mientras por keda satisfecho cu e cambio anuncia, cu ta faborece mas di 4000 empleado cu ta den e categoria cu ta haya exactamente e salario minimo stipula pa ley, nos a keda cu e pregunta pakico no a introduci un berdadero salario minimo pa ora? Pasobra loke nos tin nos dilanti ta un salario minimo pa ora calcula a base di e salario minimo pa luna/siman, cu ta e salario menciona den ley y cu ta haya cambio cada tanto tempo. Un gran parti di mundo a move o ta moviendo pa un salario minimo pa ora, un pais manera Merca tin esaki caba desde varios decada. Tambe den Reino esaki a bira e standard, unda nos a keda como unico teritorio cu no tin un salario minimo pa ora. Tambe den nos economia mes mayoria di empresa di algun of otro forma ta maneha un salario pa ora, ademas cu cierto instancia publico ta pidi un salario pa ora como base pa e informacion cu mester suministra na nan.

Nos ta supone cu e contesta lo ta: tempo. Como cu mester a cambia ley pa introduci un salario minimo pa ora, cu lo a reemplaza e salario minimo pa luna, lo a opta pa haci e cambio di e manera aki. Esaki por parce eficaz y diligente, pero e no por tin consecuencia negativo? Nos por imagina cu un empresa cu ta pagando su empleadonan na nivel di salario minimo y cu ta traha mas di 40 ora, simplemente e salario minimo a base di 40 ora, manera ley ta stipula te awe, no ta encanta cu e decision aki. E cambio cu gobierno a anuncia ta un aumento bastante grandi di payroll, dependiendo naturalmente cuanto empleado un empresa tin na e nivel aki. Motibo pa nos tira un vista riba trasfondo legal di e asunto aki.

Recientemente gobierno, mas specifico ministro encarga cu labor, a haya conseho encuanto e tema aki di tanto Departamento di Labor (DAO) como di Conseho Social-Economico (SER). Ambos entidad tabata positivo tocante e cambio proponi y den su conseho DAO por cierto a indica cu un cambio di ley pa e introduccion di un salario minimo pa ora ta requeri, unda e salario pa ora ta bira e base pa tur calculacion di salario, no ta importa cu ta pa siman, quincena, luna ni tampoco pa cuanto ora pa e periodo den e contrato laboral. Awor cu a scoge pa loke ta parce un paso intermedio, con mester mira e situacion legal actual y kico lo mester haci ainda pa por tin un texto legal cu ta refleha loke ta desea di implementa?

Na promer lugar, ta necesario pa cambia ley di salario minimo, unda e salario a base di 40 ora ta keda elimina y ta keda substitui pa un salario minimo pa ora. Na e momento aki e ley no ta duna espacio pa calcula un salario minimo pa 45 ora, aunke e ta proporcional na esun stipula pa e ley pa 40 ora.

Y si ta considera un cambio di e ordenanza di salario minimo lo ta bon pa introduci salario fiho pa ora, pa e categorianan di hoben cu awor no conoce stipulacion. E salario minimo ta conta pa persona di 18 aña bay ariba, pero e categora di 15 – pa 17 aña, pa cual e ley ta duna posibilidad pa stipula salario minimo pa nan, a keda sin implementacion, asina leu cu nos por a investiga. Esaki por haci via un salario minimo pa ora cu ta proporcional segun un cierto porcentahe di e salario minimo pa adulto y ta haya adaptacion pa inflacion na mes momento cu ta adapta e salario minimo pa adulto.

Finalmente, mester bisa cu e cambio di maneho aki, y su proximo adaptacion legal necesario, a tarda demasiado. E discusion tocante salario minimo pa ora probablemente ta hiba nos por lo menos 25 aña back. Den cambionan di legislacion laboral introduci na 2013 lamentablemente a omiti inclui e asunto aki y no tabata necesario laga mas di 10 aña pasa pa cuminza actua awor. Pa hopi aña caba por a deshaci di e inhusticia cometi contra esnan cu tabata traha 45 ora pa haya pago pa solamente 40. Cu esaki lo significa temporalmente un aumento di gasto di payroll pa empresanan envolvi, ‘so be it’. Pero, lo mester cambia ley di tur manera…