Tur preparacion pa e di tres edicion di Aruba Syphony Festival ta cla pa cuminsa dia 21 te cu 29 di juli na Cas di Cultura. T’asina cu aña pasa despues di e delaster version di e festival aki nan a logra converti e Festival y Academia Nuevo Mundo den Fundacion Nuevo Mundo cu sede riba nos isla. E fundacion aki ta esun encarga di organisa e Aruba Symphony Festival (ASF) cu a bira un opcion pa desaroya un turismo cultura riba nos isla.
E director artistico di ASF, e violinista Suiso-Venezolano, Simon Gollo, a laga sa cu ya caba e programa di e festival ta cla. E aña aki nan programa tin un proyeccion artistico mas superior ainda. “Esaki ta papia bon di e programa y proyecto pasobra ta nifica cu mas musico ta interesa di forma parti di dje”, el a bisa na Bon Dia Aruba.
Pa ehempel e programa inaugural di dia 21 di juli na Cas di Cultura ta consisti di musica popular di Beethoven y interpreta pa un trio di musico afama di Venezuela cu ta bon conoci na Aruba: Edith Peña, piano; Jorge Montilla, clarinet y German Marcano, cello. Edith Peña ta e prome musico Latino Americano pa wordo nomina pa un Grammy den musica clasico. Montilla y Marcano a yega di toca na Aruba for di tempo cu Armand Simon tabata organisa e Aruba Piano Festival durante e añanan 2007 – 2010.
Festival y participacion
E festival aki cu ta tuma luga anualmente tin como meta contribui na e crecemento cultural di Aruba pa medio di conciertonan, tayernan, conferencianan y actividadnan artistico. Cada aña Aruba ta bira un escenario internacional pa asina musiconan di prome linea di henter mundo ta comparti hunto pa presenta e Orkesta Sinfonico di Aruba y Orkesta di Camara Nuevo Mundo. Ademas e proyecto musical y social aki ta habri un posibilidad pa nos talentonan musical di Aruba por probecha di dje, habriendo nan panorama y conocemento den mundo di musica como forma di bida.
Aña pasa mas cu 100 musico entre docentenan, artistanan invita y studiantenan a yega Aruba pa participa den nan tayernan y conciertonan; y tambe pa disfruta turisticamente di nos isla. Hobennan studiante di mas cu 15 pais a topa na Aruba pa biba e experiencia aki; y e biaha aki no ta un excepcion tampoco.
Sr. Gollo a declara na Bon Dia Aruba cu tin un grupo considerabel di studiantenan cu lo participa di e Aruba Symphony Festival (ASF) 2018. E biaha aki e nivel di participantenan ta uno importante. Nan a percura pa e calidad musical lo ta mas halto pa asina nos isla por bira mas atractivo na nivel cultural y musical. E ta lamenta cu e biaha aki e participacion di studiantenan for di Venezuela ta basta limita, debi na e crisis interno cu a bira mas agudo. Mientras cu pa ehempel e participacion di studiantenan for di Colombia a crece considerablemente.
El a laga sa cu door di e slogan:“Nos tur ta igual pa medio di musica”, nos ta reconoce e poder di musica como un instrumento riba su mes pa marca e diferencia den e progreso di nos sociedad.
Aruba Symphony Festival 2017 ta clausura dia 29 di juli cu e presentacion di Aruba Symphony Orchestra cu Carlos Botero como Director. Mescos cu na 2015 y 2016, e presentacion di un orkesta completo di mas di 80 musico riba podium di e sala grandi di Cas di Cultura lo lanta hopi expectativa. Tur concierto programa lo ta gratis cu excepcion di e concierto di clausura di dia 29 di juli.
