Nivel di menasa pa atakenan terorista na Hulanda awo ta “significante” y “real”

(NLTimes) – E nivel pa atakenan terorista a aumenta na su di dos nivel mas halto riba diamars, cu un menasa di un “chens real” pa un atake, Nationaal Coördinator Terrorismebestrijding en Veiligheid (NCTV) a skirbi den un reportahe. E nivel di menasa a subi na su nivel mas halto den 4 aña.

E sistema di evaluacion usa pa NCTV ta un escala cu ta subi for di e prome nivel cu ta esun menos severo, te na e di 5 nivel cual ta esun mas severo. NCTV a subi e alerta for di nivel 3, cual ta considera “significante” na nivel 4, cual ta considera “substancial”.

E cantidad di apelacionnan conoci pa atakenan ehecuta pa organisacionnan Jihadista a aumenta, parcialmente a causa di e escalacion di e conflicto den Midden-Oosten y e destruccion di copianan di Quran cual a ser pega na candela den varios pais. Atakenan recien den e paisnan bisiña ta mustra cu e yamadonan aki ta ser contesta, NCTV a declara. E nivel di menasa a bula for di nivel 2 pa nivel 4 den comienso di aña 2013. El a permanece den e posicion aki te ora cu autoridadnan Hulandes a baha e evaluacion na nivel 3, unda e menasa ta considera “posibel.” Esaki a tuma luga fin di aña 2019. E organisacion a skirbi cu “medidanan extra di siguridad” recientemente a keda implement sinembargo no a elabora riba ki medidanan esaki ta.

NCTV tambe a señala na arestonan recien cu a tuma luga na Alemania, cu autoridadnan na e pais bisando cu nan a preveni atake na mercadonan di pasco den e pais. Tambe a aresta hende na Hulanda e aña aki bao sospecha di desaroya plannan concreto pa comete atakenan terorista. Segun NCTV, e arestonan aki ta mustra cu e Jihadistanan ta prepara pa comete violencia y ta haciendo e preparacionnan pa esaki. Pero tambe ta mustra cu “inteligencia Europeo y servicionan di siguridad por identifica terorismo y evita atakenan.”

Conhuntamente cu atake di gruponan Jihadita, NCTV a reporta cu e menasa for di extremismo derechista tambe ta keda presente. “Ta keda e posibilidad cu un menor of hoben, radicalisa dentro di e ambiente online di extremismo derechista, por bay na violencia,” el a nota. NCTV tambe a enfatisa e menasa di extremismo anti-constitucional, “cual generalmente no ta posee un menasa di violencia.” Sinembargo, NCTV a nota cu tin minorianan chikito cu “ta considerando ora cu violencia por keda hustifica of preparando pa un confrontacion violento dentro di gobierno.”

Pa e 3 gruponan aki, e mundo online ta hunga un rol “relativamente grandi den plama propaganda, forma rednan y haci contactonan nobo.” E investigadornan tambe a nota un aumento den mensahenan di odio contra Hudiunan y miembronan di e comunidad LGBTI.