For di 2’or atardi te cu 9’or anochi, Gerencia di WEB y dirigentenan di sindicato SIWA a reuni pa busca un acercamento cu lo por a permiti ambos partido sigui nan negociacion di e prolongacion di nan CAO cu ayudo di intermediacion di Mediador di Gobierno. Pero te ainda nan ta leu for di otro.
Apesar di e reunion intensivo aki cu presencia di Mediador di Gobierno, Sr. Anselmo Pontilius, te ainda nan no a bin cu un salida satisfactorio. Tanten e welga cu e trahadonan di WEB a cuminsa ayera mainta ta sigui keto bay. Awe e reunion entre gerencia di WEB y SIWA ta continua 9’or di mainta na sede di Mediador di Gobierno.
Accion di trahadonan
Ta asina cu despues cu Gerencia di WEB y sindicato SIWA a reuni ayera te hasta den oranan di madruga pa busca un acercamento riba e negociacion di prolongacion di nan CAO, nan a pega. Directiva di sindicato SIWA a haya mandato for di nan miembronan pa bay den accion ayera mainta, manera nan a yega di expresa den un carta cu nan a manda pa Gerencia di WEB.
E echo aki ta sosode na momento cu awe ta tuma luga e apertura di e 7 version di Green Conference Aruba, caminda e compania di utilidad WEB ta su sponsor principal. Otro preocupacion tin di haber cu prestacion y stabilidad di servicio, tanto di awa como di coriente tambe. Lider di SIWA, Sr. Eric Henriquez a yega di vocifera cu e accion aki inicialmente no ta afecta nos comunidad directamente, ya cu e reserva di awa ta hopi halto y WEB ta keda stabiel pa e parti di coriente tambe.
Ayera mayoria di trahadonan di WEB a dicidi di bay accion pa sostene nan sindicato cu tin varios luna negoshando un CAO. SIWA ta culpa gerencia di e compania di utilidad cu no ta duna espacio bay niun caminda dilanti den e negociacion aki.
Mientras di otro banda gerente di e compania sr. Luis Oduber a yega di declara cu e dos partido no por yega na otro, y dado momento e sindicato a bandona e mesa.
Gerencia a presenta un pakete, pero SIWA no a bay di acuerdo cu loke a wordo ofreci. E demanda di e trahadonan ta basta amplio, e tin di haber cu aumento di salario, pero tambe beneficionan secundario cu nan ta wak cu nan no a bay dilanti den e pakete presenta pa gerencia di WEB. Pa SIWA nan ta puntonan categorico cu nan miembronan no ta acepta pa bin cu cambio; ya cu nan ta mira cu tin espacio financiero pa implementa nan. Tambe nan a haya cu pueblo mester haya su parti cu ta e descuento riba e tarifa cu a keda anuncia recientemente.
