Te asina leu cu departamento di Inspeccion di Enseñansa a wordo informa for di siman pasa te awe, tur scol na Aruba a cuminsa normalmente nan aña escolar nobo. “Te na momento aki no tin nada particular cu nos a tende cu ta iregularidad”, asina Inspector General di Enseñansa, sr. John Hessen a declara na Bon Dia Aruba ayera.
Encuanto e scolnan cu tabata den proceso di drechamento, sr. Hessen a declara cu te aworaki nan no a tende nada cu niun scol no a habri pa causa di trabou di drechamento. Pues tur scol a cuminsa su aña escolar nobo 2016-2017, normal. Di otro banda tabatin algun cu pa motibo organisatorio a cuminsa diabierna, pero e departamento aki no tin niun indicacion cu te ainda nan no a habri. Tin algun situacion manera esun di EPI cu ta concerni directamente na minister di Enseñansa.
Ayera departamento di Inspeccion di Enseñansa a bolbe a tuma contacto cu algun directiva di scolnan rond di nos isla, y tur a informa cu nan a cuminsa nan aña academico caba. E ta reitera “cu no tin iregularidad cu Inspeccion ta encarga cun’e… Te awor aki no!”, el a bisa.
Sr. Hessen ta agrega cu ta keda na cada directiva di scol pa nan percura pa nan respectivo scol ta draai optimal. Na momento cu tin un iregularidad cu departamento di Inspeccion tin cu cay aden, nan mester regularmente informa e departamento concerni aki, pero esaki no a pasa ainda.
Loke por pasa hopi biaha –segun sr. Hessen- ta ora cu pa ehempel un scol a wordo renoba y trabou pa cualkier motibo no a keda cla na tempo manera plania, y nan mester pospone e fecha di apertura di e scol encuestion. E ta un situacion cu por pasa, pero e biaha aki e no tabata e caso. “No tin nada cu a wordo pidi pa habri hopi mas laat”, el a bisa.
E ta aclaria cu trabou cu ta tuma luga directo of indirectamente den scol, Inspeccion di Enseñansa no ta wordo envolvi aden, ya cu e ta un trabou cu ta resorta den otro departamento manera DOW, etc… Pero ora cu ta trata di lesnan cu a cay afo of scol cu ta cuminsa mas laat di e fecha stipula, e ora Inspeccion di Enseñansa ta cay aden, pero esaki tampoco tabata e caso, segun sr. Hessen.
El a finalisa bisando cu “tur cos ta andando segun plannan, no tin nada cu a bay for di planificacion ”.
