E asegurado cu ta bira malo y cu ta meld ziek na trabou y cu ta notifica Banco di Seguro Social (SVb), tin tur proteccion di ley. Kiermen nan no por wordo kita fei di trabou, y tampoco obliga pa bay traha durante e periodo cu e ta AO.
Director di SVb, Edwin Jacobs a informa cu na momento cu un dokter di control di SVb ta declara un persona incapacita pa traha, e persona aki pa por haya e compensacion economico for di fondo di seguro di malesa, e mester percura pa recupera.
“Cu e doctor di control ta declar’e incapacita ta pasobra e tin un problema cu ta impedi di traha. Y na e momento ey, e tin cu tuma tur medida necesario pa e recupera di locual e ta sinti pa e bay traha.” Den e caso aki, director di SVb ta haya cu ta iresponsabel di doño di trabou pa pidi un trahado cu ta AO bay traha.
Seguro di malesa
Den nos seguro di malesa e unico persona autorisa pa declara un hende AO ta e dokter di control di SVb. El a indica cu den e caso aki no ta doctor di cas, ni specialista ta declara AO un hende, sino exclusivamente e dokter di control di SVb. E ta e unico autorisa pa haci esey, segun nos ley di seguro di malesa y accidente.
Ademas su decision ta suheto na e huicio di e corte di apelacion pa loke ta trata AO. Den caso cu un persona no ta di acuerdo cu e decision di un doctor di SVb pa loke ta trata su huicio di capacita of no capacita, e por acudi na e corte di apelacion pa presenta su caso.
Na momento cu SVb ta haya sa cu un persona cu ta AO a wordo obliga pa bay traha, e instituto aki lo por suspende e pago cu e doño di trabou ta ricibi pa e dianan cu su trahado a wordo declara AO. El a bisa cu den nan caso esaki ta mara den e ley di seguro di malesa y accidente cu nan no ta cubri dianan cu e persona ta haci actividadnan cu ta perhudica su recuperacion.
“Si un trahado ta AO, ta pasobra e no por. Y si e ta bay traha e ta nifica cu e ta strobando su proceso di recuperacion. Pasobra si e por traha, doctor ta mand’e bay traha.”, asina director di SVb a declara na Bon Dia Aruba.
Considerando e caso di e persona cu ta den absentismo laboral pasobra e ta malo a base di e control haci pa e doctor di SVb. Pero di otro banda, e ta hayando servicio medico of di salud cubri pa un instancia manera AZV, con ta para cu e asegurado? Aunke e periodo cu e asegurado di SVb ta permanece AO lo por nifica gasto pa AZV, niun instancia por obliga e persona aki bay traha si SVb no a dun’e prome AG.
Cualkier instancia of doño di trabou –segun Sr. Jacobs- mester respeta cu e asegurado ta AO, pasobra si e dokter di SVb a considera e condicion di e pashent y a determina cu e ta incapacita pa traha, ta pasobra e asegurado no ta den condicion pa bay traha ya cu e mester recupera prome.
