Niun denuncia formal contra trato di GNC; Proyecto pa expande y renoba centro di detencion pa persona ilegal

Minister di Husticia, Andin Bikker a referi riba e proyecto di renobacion y expansion di centro di detencion pa persona indocumenta of ilegal y tambe pa e personanan cu ta victima di traficacion di ser humano pa duna nan proteccion.

Ayera casualmente, mientras cu e mandatario tabata duna e conferencia aki, un disturbio a tuma luga un biaha mas den e centro di detencion di Guarda Nos Costa (GNC). El a declara cu e proyecto aki no ta debi na e denuncia haci contra derecho humano den social media tocante mal condicion di e detenidonan. Of cualkier denuncia haci formalmente na gobierno riba e situacion di e detenidonan den e instalacion di GNC.

E mandatario a bisa cu no a drenta niun denuncia formal. Pero si nan tin reunion constantemente cu e NGO’s y diferente organisacion manera Cruz Cora. Nan ta trece preocupacion individual cerca nan. E ta subraya cu nan ta haya reclamo pa loke ta trata cuminda, trato, etc. Pero ora cu nan ta bay wak mas bien nan ta tipo di casonan crea pa no keda cera eynan. Te hasta el a bisa cu e personanan aki ta haya cuminda di servicio di catering tur dia pa medio di compania renombra.

E mandatario a bisa cu nan a hereda e localidad aki den mal condicion caba. Igualmente Aruba no a yega di experiencia loke nos ta bibando durante e ultimo tempo. For di 2015 tin persona cu a bin Aruba y keda ilegal. Na mei 2018 centenares di persona a aplica pa asilo algo nunca antes bisto. E averahe tabata di dos persona pa aña.

Tur e situacion anterior ta pone un presion -segun e mandatario- riba tur loke tin cu atende cu e situacion di ilegalidad aki. E capacidad ta limita y ‘bo tin cu traha cu loke bo tin,’ el a bisa.

Tambe nan tin hopi deseo, pero e condicion financiero ta limita. Sinembargo gobierno por haya sosten financiero di Hulanda pa optimalisa e facilidad di detencion. E lo nifica un condicion miho di loke tin aworaki y luga optimal pa e personanan ilegal deteni y esun victima di e negoshi di traficacion di hende. Pero tambe pa e personal mes di GNC cu ta traha bao hopi stress. E no ta descarta cu organisacion no gubernamental (NGO’s) ta bay ta hopi satisfecho cu gobierno ta optimalisando e facilidad aki.