Ningun organisacion a acerca DAS pa yuda cu articulo di scol e aña aki

Durante e temporada di vakantie grandi, famianan vulnerabel ta acerca Departamento di Asunto Social (DAS) pa pidi ayudo cu articulo di scol. Pa medio di esaki DAS kier splica den ki forma ta intermedia pa famianan cu mester ayudo cu articulonan di scol.

Colaboracion di organisacion
Departamento di Asunto Social ta depende riba colaboracion di organisacionnan pa por yuda cu articulonan di scol. Durante añanan anterior, diferente organisacion tabata acerca DAS pa asina DAS yuda nan cu un lista di muchanan den necesidad. E lista cu DAS tabata traha tabata un lista adapta na e necesidad specifico di cada mucha. Ora e donacion yega DAS, DAS mes tabata parti nan, pa asina semper respeta e privacidad di cada cliente. Durante e ultimo añanan, e cantidad di organisacionnan cu ta acerca DAS a baha y por hasta bisa cu e aña aki ningun organisacion a acerca DAS.

DAS ta evalua e necesidad specifico di e mucha pa e aña escolar nobo y a base di un combersacion tabata traha un lista cu ayudo specifico, cu ta consisti di e.o. uniform, keds, tas, agenda, y demas articulonan di scol. Algo sigur cu DAS tabata percura p’e tabata pa evita pa e mesun mucha wordo yuda cu e mesun articulonan mas cu un biaha y asina duna e espacio pa mas otro mucha den necesidad haya e oportunidad di ricibi ayudo.

Tarea di trahado social
E trahado social ta ofrece sosten, conseho y guia na clientenan cu pa un of otro motibo ta den un situacion dificil. E por ta un problema na unda e persona no sa con pa sali di dje, of e persona por tin un pregunta y ta desea un conseho. E aña aki DAS a intermedia pa mayoria di cliente cu tabatin mester ayudo cu articulo di scol, cu Fundacion Pa Nos Comunidad (FPNC). Ademas di intermedia cu FPNC, e trahado social tambe a intermedia cu scolnan pa asina purba di yega na un areglo di pago.

Conclusion
DAS ta atende tur persona cu acerca DAS pa un ayudo cu articulonan di scol, pero prome cu intermedia, e trahado social ta evalua cada situacion y tambe ta duna conseho profesional con pa yuda e famia stabilisa su mes financieramente y ta ofrece guia y conseho pa asina por logra stabilisa nan bida y asina mehora nan calidad di bida.

Pa mas informacion of pregunta por semper tuma contacto cu Departamento di Asunto Social su seccion Guia Social na telefon 528-1100. Tambe nos ta invita bo pa ‘like’ DAS su pagina di Facebook “Departamento di Asunto Social” pa haya hopi herment valioso riba tereno social.