Ningun momento Directiva di Fundacion Parke Aruba, FPA ta impone un reduccion di 40 porciento riba salario di trahadonan di Parke Nacional Arikok. Realidad ta si cu entradanan a cay drasticamente y contrario na e 20 porciento cu miembronan di staf a entrega desde Mei, rangernan mester contribui mas pa por scapa existencia di e fundacion. Asina Director Interino y Presidente di Hunta di Directiva di Fundacion Parke Aruba Norman Kuiperi a bisa Bon Dia Aruba.

E cantidad di bishita di parti di turista a cay cu 82 porciento na 2020, y esaki no tin nada di haber cu e limitacion di UTV den Parke. Al contrario. E caida a bin desde inicio di e pandemia na Maart y a bira mas urgente pa motibo cu pa un of otro motibo, SVB no tabata honra e peticion di FPA pa loonsubsidie. “Tabata despues di cuater peticion, y cu sosten di Gobierno y Prome Minister Evelyn Wever Croes como e Minister encarga cu a logra haya e loonsubsidie.”

Kuiperi a bisa cu FPA ta ricibi subsidio di Gobierno, pero cu e suma no ta cubri ni 60 porciento di salario di e personal cu ta 48 persona en total, incluyendo miembronan di staf.

UTV y proteccion

E tarea primordial di Fundacion Parke Aruba ta proteccion di e reservanan natural di Aruba. Y pa haci esaki mester tin un personal cu ta yuda den e trabao. Hopi local a sostene e parke, pero e bishitanan di turistanan cu a cay afo a afecta e situacion financiero. E rangernan ta acusa FPA di a stroba e tournan di UTV. “No ta Fundacion Parke Aruba a para tours di UTV. Ta Fundacion Offroad Aruba a bay Corte pa impone nan deseo, despues cu nan a laga nos sinta na mesa. Y ta na Augustus Huez a duna su sentencia. Pero e ta importante pa henter comunidad, incluso trahadonan di Parke Nacional Arikok, realisa cu obhetivo principal di e reserva natural ta proteccion di naturalesa.”

Trahadonan no ta empleadonan publico

Hopi ranger ta kere cu nan tin e mesun derecho cu ambtenaar, segun Norman Kuiperi. Nan ta bao un impresion robes y ta kere cu tin placa. No tin. Pa e motibo ey mes, hasta prome cu a para e tournan di UTV, a propone un reduccion di 20 porciento riba salario, manera e miembronan di staf a bay de acuerdo cune. Sinembargo, na final, FPA a acepta e proposicion di un reduccion di 5 porciento. “E tempo ey nos tabatin speransa cu pa September e pio di e pandemia lo tabata tras di lomba. Pero obviamente esey no tabata e caso. Trahadonan a puntra ki dia e situacion ta normalisa y ta dificil pa bisa pasobra e pandemia ta afecta henter mundo y no tin dia pa bisa cua ta bay ta e fin.”

FPA ademas, mester a envolve abogado pa por haya loonsubsidie cu a keda nenga na cuater ocasion, y ta te ora cu Gobierno y Prome Minister a realisa con grave e situacion ta, a haya apoyo pa FPA ricibi loonsubsidie. Pero ora cu trahadonan mester a firma manera ta e rekisito pa ricibi loonsubsidie, nan no kier a haci tal. “Si nos ta purba pa haya placa, y bo no kier firma, anto lo tin consecuencia.”

Negociacion

“Ora cu nos a pidi trahadonan na comienzo pa entrega 20 porciento, kizas pa haya 12 porciento di reduccion. Finalmente nos a haya 5 porciento di reduccion. P’esey nos a pidi 40 porciento awor pa negocia un porcentahe cu por yega na otro. Pero nan ta bay media y bisa cu FPA ta impone 40 porciento. Esey no ta berdad. Nos ta propon’e. Nan a acusa nos di ta e pio directiva cu tin. Pero e hecho ta cu e directiva anterior a djis entrega retiro den un solo tiro. Mi ta compronde nan posicion, pero nos no por bay den pasado manera e trahadonan a sugeri. Nos no por haci milager.”

Es mas, trahadonan a hasta laga sa cu nan no tin problema si FPA mester bay bancarota, basta cu nan no entrega salario. “Nan no ta realisa cu 30 mil hende rond Aruba sin trabao.” Kuiperi a bisa cu e no ta nada agradabel pa duna trahadonan mal noticia. “Nan mes a admiti cu nos ta e prome directiva cu a sinta cu nan. Pero awor nan ta tilda nos di ta esun pio. Pero e acusacion aki no tin balor. Locual ta importante ta pa sinta na mesa y salba Parke.”

Gastonan prome cu pandemia

A acusa e directiva actual di a hisa gasto. “Prome tabatin un problema di luho, unda no a tene cuenta con por mitiga un crisis ora cu fondonan cay afo. Terenonan di Gobierno a bay bao maneho di FPA pa nos proteha nan. A cumpra Boca Prins Restaurant y area pa como 1.5 miyon florin cu tabata fondonan cu pa hopi aña a pone un banda y a pasa e tereno pa un florin pa Gobierno. Tambe mester a drecha e dos edificionan di parke cu desde nan construccion nunca a haya mantencion. E decision tabata prome cu e pandemia y e contratista a caba cu e trabao, hasta bao di e suma presupuesta.”

Segun Kuiperi, e directiva ta haciendo su trabao. “Nos a corta mas di 600 mil na gasto na 2020, pero e realidad ta cu 82 porciento di e bishitantenan internacional di 2019 a cay afo. Berdad a bin mas di 40 mil turista na December, pero Parke Nacional Arikok no tabata ricibi e mas di 1 miyon di turista cu a bin Aruba na 2019. ‘Ta un porcentahe di e bishitante ta bin Parke. Nos trata pa wak diferente forma pa atrae nan y ta hiba un mercadeo pa nos logra mas turista pa bishita parke. Nos ta aumenta nos mercadeo pa ora cu cos mehora,” Kuiperi a enfatisa.

Tres opcion

Tin tres opcion riba mesa pa trahadonan di FPA. “Entrega 20 porciento y nos lo sigui cu tin. Of e otro opcion ta pa acepta un pakete segun normanan Hulandes pa termina relacion di trabao. Si nan no tuma ningun di dos, FPA no tin otro opcion cu no ta esun di Corte.” Kuiperi a enfatisa cu sin reduci 20 porciento di salario, FPA no por sigura cupo di trabao. Algun hende ta kere cu Parke tin un bari di placa, Banconan comercial mes a gana na Corte pa baha salario pa motibo cu nan entrada a baha.”

Norman Kuiperi a bisa cu el a a sinta henter dia dialuna ultimo pa splica cu cifra, pa splica con e realidad ta. “Y tabata pa prome biaha cu trahadonan no a cana sali. Siman pasa a purba haci mescos y nan a simplemente lanta cana bay, pasobra nan no kier acepta cu Aruba no ta den crisis. Nan ta lubida cu nos ta den un situacion cu ningun hende a pidi p’e.”

Tambe a pidi Gobierno pa cambia e decreto ministerial pa asina aumenta e prijs di entrada pa parke. E entrada normal ta keda cinco florin, pero a pidi un aumento chikito pa e entrada anual. Locual si a pidi ta pa hisa e entrada pa turista di 12 pa 15 dollar, pero cu servicio adicional. Ta trahando riba diferente forma di mercadeo pa purba atrae mas turista.

E medidanan ta temporal, pero e problema ta cu no sa ki tempo e situacion ta normalisa. Ningun hende por bisa ki tempo e crisis lo pasa. Pero bao ningun circunstancia, FPA lo bay haci prestamo pa cubri gastonan salarial. “Mi tin mi Minister y Hunta di Directiva para mi tras.”

Dos pechi

Kuiperi ta funciona cu dos pechi. E ta Presidente di Hunta di Directiva y ta Director Interino.

El a asumi e encargo ora cu e Director anterior a raporta malo na Juni, y despues a tuma retiro. E trabao tabata urgi pa un hende reemplaz’e. E hunta a apunta Kuiperi pa asumi e responsabilidad temporalmente. Su prome decision ta pa tanten cu no tin fondo, pa no nombra un Director. E por ta carga dos pechi pero ta hopi cauteloso pa no bruha e autoridadnan y tin control di e hunta constantemente pa no tin conflicto di interes. “Nos ta den un situacion di crisis y p’esey mi ta carga dos pechi. Pero asina cu cos mehora, mi por cu menos ora di trabao.” Norman Kuiperi ta tin su mesun trabao y su doño di trabao ta dun’e e oranan necesario pa haci su trabao pa FPA y ta tuma dia liber ora cu e mester pasa un of mas dia na oficinanan di Parke.

Mientrastanto, Bon Dia Aruba a trata na varios ocasion pa haya comentario di SEPPA, cu ta representa e trahadonan di Parke Nacional Arikok, pero e intentonan tabata envano.