Mientras cu talvez no tabata spera un accion di Ministerio Publico mas den e caso di corupcion na Arubahuis, e siman aki a manece di forma diferente cu detencion di e ex-ministro plenipotenciario mes, como sospechoso principal den e caso yama ‘Tulipan’. Esaki a sigui despues di e detencion reciente di e director suplente di Arubahuis den e mesun investigacion.

Por ta cu tin hende ta puntra nan mes kico ta e motibo pa persigui e ex-ministro despues cu el a haya caba e sancion di gobernacion perdiendo su puesto como empleado publico, hasta tabatin caso den corte di su banda, refutando su retiro y perdiendo e caso ey. Esey tin su logica den e sentido cu e retiro no ta un castigo hudicial, sino e sancion imponi di banda di e empleador, den e caso aki Pais Aruba, pa incumplimento cu su obligacionnan como empleado publico.

Di un banda ta bon cu finalmente a yega e momento pa Ministerio Publico haci su trabao, pero pa basta tempo cos no tabata mustra den e direccion aki. Na promer momento a tarda pa reconoce cu tabatin un problema na Arubahuis, despues – corectamente – a laga CAD haci un investigacion, pa seguidamente comete otro eror manteniendo e rapport secreto y no pasa esaki pa autoridadnan hudicial. A duna un comision gubernamental e tarea di analiza e situacion, loke a conduci na motibo pa actua. Despues a tuma lugar henter e proceso di actuacion disciplinario, como dunador di trabao, te na e caso di apelacion den corte. Nos no ta bisa cu accion di parti di oposicion politico a hunga un papel, pero e realidad ta cu despues di e denuncia haci – pa falta di accion di banda di gabinete, finalmente Ministerio Publico a actua, y esey ta unda nos ta awe.

Mester ta claro cu, si nos contempla tur loke a sucede den secuencia cronologico durante ultimo añanan, esaki no por sirbi como un guion, un modelo pa maneha e tipo di caso aki. Esey seguramente no, pasobra den pasado, reciente y mas leu atras den pasado, a sa di maneha e asunto concerni di manera diferente. Ta mas cu visto cu tabatin un intento pa alarga e proceso, talvez cu e speranza cu e asunto por a keda limita na e aspecto di sancion di e dunador di trabao y sin persecucion hudicial.

Un problema adicional cu a crea cu e forma di atende e caso, ta cu a duna inicialmente un trato special na e ex-ministro, dunando e impresion cu tin dos o mas set di regla, segun e importancia, politico o di otro indole, den e caso di e ambtenaar implica. Sin duda algun awor lo por bisa, di banda di e gabinete, cu a actua y cu e resultadonan ta proba esey. Nos lo keda mustra sin embargo riba e obvio falta di diligencia, cu segun nos opinion tin di haci cu e ‘embarassment’ di e momento pasobra ta trata – atrobe – di un miembro prominente di e partido grandi den actual coalicion. Pero hustamente pa e tipo di vacilacion den un caso asina ta laga e momento bay perdi pa demostra cu tin un solo husticia pa tur hende. Y cu tin motibo pa demostra esaki nos por mira na cierto sucesonan den ultimo añanan, unda no necesariamente tabata gobierno cu a faya, sino otro entidad (semi)gubernamental y e propio Ministerio Publico. Nos ta menciona aki, no pa promer biaha, e caso di fraude cu e Paptestnan na Laboratorio na Hospital, unda tabata existi un falta di animo pa haci e trabao obligatorio den e caso aki. Na promer instante Ministerio Publico no tabata kier a actua, o en todo caso tabata duna e impresion ey, pasobra “no a ricibi ningun denuncia”. Un argumento un poco straño pasobra den e caso “Ibis” procurador general a señala cu e caso a cuminza cu cierto indicacion riba medionan social riba internet… Ministerio Publico ta lesa corant ora ta conveni so? Finalmente e instancianan concerni a haci denuncia, y e asunto e yega te eynanan…, no a tende nada mas, contal cu e dos sospechosonan por a bandona Aruba, sin ni un dia a duna cuenta tocante e proceso aki.

Naturalmente, por puntra awor kico ta e proposito di trece tur esaki dilanti? Nos por constata na promer lugar cu tabatin cambio positivo den actuacion di Ministerio Publico den ultimo añanan, y cu ki resultado: seis (6) caso contra funcionario halto di ken cinco tabata ministro, desde e momento cu e promer caso contra e ex-ministro encarga cu labor a cuminza na 2016. Como pais nos ta casi ‘score’ un caso ministerial pa cada aña. Nos ta bisa esaki pa ridiculiza nos gobernacion? No, pero ta importante pa remedia algo cu ta bay mas leu cu djis atende e casonan individual manera nan ta sucede y laga e asunto te ey. Esaki ta e momento pa haci algun cos sumamente importante. Por ehemplo: tin keto bay fayo considerable den administracion financiero na varios lugar den gobernacion, Arubahuis lo no ta e unico ehemplo. Mehora y impone un control severo pa un y tur ta obligacion di cualkier gobierno, unda no tin lugar pa faboritismo di ningun color (politico). E actitud vacilante cu gobierno a tuma den e caso na Arubahuis ta mustra riba un falta di voluntad pa tuma e caminda corecto, y ademas informa comunidad di kico ta pasando. Nos ta keda confronta cu propaganda ora gobierno ta haya esey apropia, pero den practica no ta usa e ehemplonan na man pa proba cu tin ley y regla uniforme pa tur.