Awe ta un dia di fiesta na Jaburibari 8B caminda Nine Lives ta bay tin su adoption day den conexion cu Dia Internacional di Bestia e cual a ser celebra ayera dia 4 di october.

Awe tardi for di 4or di atardi te cu 7or di anochi, cada hende cu lo drenta na e fundacion lo haya informacion di dos clinica cu ta Animal Care Clinic Aruba y Veterinary Speciality Hospital Aruba (VSH) cu nan veterinarionan y specialistanan pa asina aclaria cualkier pregunta of duda cu esnan cu ta bay adopta un pushi lo por puntra.

Sra Zoeyn Conijn di Luna Foundation tambe ta bay ta presente pa motibo cu algun luna pasa nan a rescata un cacho y door cu e fundacion aki tabata full caba, Nine Lives a tum’e y ora a haya luga e cacho a bay cerca Luna Foundation.

“Nos tin tur clase di pushi, baby, junior cats, adult cats, tur sorto di color cu nan kier tambe tin, nos porta ta habri pa nos pushinan por haya nan mesun hogar,” Sra. Geraldine Toro vice-presidente di Nine Lives a bisa.

Na e momentonan aki nan tin basta pushi den nan fundacion y loke nan kier ta pa nan wordo adopta y asina ey nan por sigui yuda e otro pushinan riba caya “si ta adopta un pushi, nos por tuma un otro pushi di caya den e fundacion.”

Normalmente, Nine Lives ta tene nan Adoption Day tur luna pero e biaha aki nan a dicidi di haci uno special invitando specialistanan den area como veterinario y otro fundacionnan manera a menciona caba.

Den fundacion aworaki tin 47 pushi y na Colony Cats tin 110, den e Colony Cats aki tin e pushinan cu hotelnan of restaurant no kier y nan ta trapa nan y sterilisa nan pa por hiba nan na Colony Cats “tur anochi nos tin nos boluntarionan cu sin falta un dia, nos pushinan ta warda ora nan ta yega pa duna nan cuminda, akinan nos ta papiando di feral cats, kiermen cu nan no ta mucho amigabel, tin otronan cu si ta mas trankilo, nan ta biba eynan, nan ta sigur y nan tin cuminda y awa.”

Tocante e proceso di adopcion, normalmente nan ta pidi un adoption fee di 100 florin pero door cu ayera tabata Dia di Bestia nan ta lag’e na 75 florin, esaki ta encera cu ora ta adopta un baby pushi, e ta haya un medicamento pa purga y carpata. Den seis luna Nine Lives ta yama e doño pa informa cu e pushi a yega na seis luna y nan a traha un afspraak pe na veterinario pa asina hib’e y sterilis’e. Ora e pushi ta sterilisa, e ta haya su micro chip.

E fee ta pa djis cubri un parti di sterilisacion pa motibo cu normalmente sterilisa un pushi muhe ta costa 125 florin “e ta pa yuda nos y un tiki nos ta cover e resto, pa nan por yuda cu e gastonan,” Toro a splica.

Recientemente a ser crea un fundacion denomina Paws United e cual hunto cu otro fundacionnan manera Animal Welfare Alliance Aruba (AWA) cu ta sterilisa y castra, Luna Foundation, Nine Lives, entre otro, ta bin hunto y drenta den e barionan pa sterilisa e pushinan y cacho, na augustus nan a drenta na Madiki unda nan a sterilisa mas cu 500 pushi y cacho den nuebe dia.

Awor den luna di october y november nan ta bay bishita e bario di Dakota un biaha mas pa nan bolbe sterilisa y castra, asina combati e crecemento di pushi cu cacho.

Tocante e situacion riba caya di pushi cu cacho, Toro a sigura cu e situacion ta bin mehorando “pero e por miho, vooral pasobra nos ta wak cu den nos hendenan grandi, nos ta hayando hopi melding, cu ta bisa cu por lo menos tin 20 of 25 pushi. E problema ta cu ora e prome pushi a yega nan no a sterilisa y un pushi den un aña e por haya 3 biaha baby. P’esey nos ta papiando aworaki cu e pensionadonan pa ora nan please ripara cu pushi a bin, contact nos pa nos bay sterilisa y no warda pa e bira grandi unda cu cos por bay for di man.”

Tin casonan di un cas cu na e momentonan aki tin 110 pushi y na otro cas tin 75 “e ta bira hopi y vooral ora bo ta pensionado cu por ta nan ta sinti nan so y nan ta haya compania,” el a declara.

Pa finalisa, el a duna como mensahe pa Dia di Bestia “ban nos tur respeta nos bestianan, pasobra nan tambe tin sentimento, nan tambe ta sinti y pa corda semper, sterilisa bo mascota.”