Un hub di transportacion cu ta conecta Caracas te Fort Lauderdale, Miami via Aruba, cu conexion posibel tambe na Corsou, via cual por transporta cualkier cos di manera fast. Segun un fuente anonimo, e yiu di un ex-mandatario ta maneha un nightclub den e edificio cu e FBO ta opera, mientras e ni tabata parti di e plan inicial di W Aviation.

Recien por a mira cu Ministerio Publico, conhuntamente cu Landsrecherche y Recherche Samenwerkinsteam (RST), a haci un entrada hudicial na W-Aviation, cual ta e compania cu ta maneha e aeropuerto priva General Aviation Terminal. E entrada lo ta relaciona cu investigacion riba adkirimento di tereno di gobierno cu no a cana di manera corecto.

Esaki no ta toca e cuestion ey, si no en bes e hecho cu 2 fuente distinto ta indicando cu na W-Aviation tin cosnan pasando cu ta suficientemente sospechoso pa merita un otro investigacion apart di loke ya ta haciendo. E prome fuente ta e pagina di Facebook Anonymous Network Aruba, cual den un nota publica 24 di juni ta detaya con den 2017 e contract pa maneha e aeropuerto priva a caba. Den e nota ta menciona cu un sr. Stamper tabata opera e aeropuerto priva. Despues un compania maneha pa R. Helder, Fast Delivery Real Estate NV lo a gana e destaho pa maneha e compania “AVSERMA” Aviation Services & Management Co. NV.

‘Destaho regla pa apodera di aeropuerto priva’
Nos periodista a combersa via canal digital cu un persona cu a prefera keda anonimo, unda e tambe, mescos e pagina aki, ta mira cu e procedura di destaho pa apodera di e aeropuerto priva chikito aki no a bay manera mester a bay. E periodista a papia via un canal sigur cu un bos femenino, (nomber no conoci) kende a splica cu e tabata traha cerca cu doño di e companianan Fast Collections & Delivery NV, Fast Delivery Real Estate NV, FBO W Aviation NV y un cantidad di otro compania manera Headlines Entertainment and Promotions NV.

Ya un tempo prome cu e pagina Anonymous Network Aruba a comparti su nota, e fuente a papia cu e periodista pa conta con e persona encarga cu e companianan aki a gana hopi destaho durante e periodo cu ex-minister Oduber a sinta como minister di Infrastructura den Gabinete Wever-Croes. “Nan no a gana tur, pero si nan a gana hopi, y sigur tabata envolvi nan den mayoria, incluyendo esun di e aeropuerto priva”, el a conta. E bid aki, e fuente a bisa, tabata maneha pa un gerente halto di AAA NV. Lo a cera e contract riba 31 di december 2017.

Tanto e pagina como e fuente anonimo ta indica cu a cera e acuerdo pa run W Aviation tempran den 2018, despues cu e acuerdo anterior a caba fin di 2017. Segun e pagina, cosnan inusual tabata pasando ultimo par di luna, unda por a nota supuestamente cu avionnan tabata yega na e aeropuerto priva despues cu Douane ya no ta operando mas, despues cu aeropuerto internacional Reina Beatrix no ta operando tampoco.

3 di januari W a anuncia inversion di 1.8 miyon dollar, FBO na Aruba a lanta 12 di januari

Riba Corporate Jet Investor por mira un comunicado data 3 di januari 2018 unda ta indica cu W Aviation, un division di Windsor Group na Fort Lauderdate Executive Airport a tuma over e FBO na Aruba y a agrega esaki na e network di FBO cual ta inclui Venezuela. Den e articulo aki ta bisa cu a inverti 1.8 miyon dollar pa mehora tur facilidad.

Interesante ta pa nota cu e comunicado di prensa aki tabata cla ya riba 3 di januari 2018, mientras no a incorpora oficialmente e compania FBO W Aviation NV te 12 di januari 2018. E fuente anonimo a bisa cu esaki ta pasobra ya a ‘drecha’ e asunto aki di basta tempo caba, y tabata djis wardando pa cuminsa oficialmente.

Ignacio Martinez tabata e partner cu Helder tabatin den operacion di servicionan di delivery y di aerolinea. Helder a logra conecta tambe un avioneta chikito cu logo di FAST na aeropuerto di Corsou, unda e tin un compania registra na mesun nomber cu esun na Aruba desde 7 di october 2008.

Ex-abogado supuestamente a traspasa accionnan y nightclub no tabata den lease agreement

Sinembargo e fuente anonimo ta conta cu “nan a traiciona e partner na Merca, pasobra tras di su lomba nan a pasa su shares di e compania pa e director mes”. E partner na Merca, segun e fuente, tampoco tabata sa cu lo a bin cu un nightclub na W Aviation na Aruba, en bes tabatin un espacio destina pa bira un restaurant. “E nightclub nunca tabata parti di e lease agreement, pero nan a hacie toch”, e fuente a bisa. Segun e pagina su nota, AAA NV no tabata na altura di e nightclub aki tampoco.

E fuente ademas a bisa cu “riba e traspaso di shares, un empleado di Helder a skirbi e papelnan pa haci esey posibel, un abogado cu a perde su titulo como abogado pa via di actuacion incorecto”. Si esey lo ta e caso, lo ta importante pa cuestiona con un ex-abogado cu a haya medidanan disciplinario contra dje por ta skirbiendo papelnan legal pa personanan priva? Esey por segun reglanan? Nos a confirma cu e abogado en cuestion no ta miembro mas di Orde van Advocaten di Aruba.

Comments are closed.