(AP) — Presidente Nigeriano, Muhammadu Buhari, ayera a duna apertura na e refineria di petroleo mas grandi na Africa, cu speransa cu e por yuda e pais rico den energia logra autosuficiencia y converti den un exportador neto di producto refina di petroleo.
E facilidad di $19 biyon construi pa Aliko Dangote, e homber mas rico di Africa, den e hub economico Nigeriano di Lagos, ta un di e refinerianan mas grandi na mundo y tin capacidad pa 650mil bari pa dia.
Algun analista a yam’e un “game-changer” pa sector di petroleo y gas natural na Nigeria, cual ta den problema pa hopi aña, mientras otro ta bisa cu hortamento di azeta por limita su capacidad. Mayoria di refineria estatal Nigeriano ta mal manteni y operando hopi bao capacidad. E nacion west Africano mester importa productonan refina di petroleo pa su propio uso a pesar di ta e productor di azeta mas grandi na Africa.
E refineria nobo “ta bay permiti nos abastece no solamente e demanda di nos pais sino tambe bira un actor clave den e mercado Africano y global,” Dangote a bisa.
E refineria ta bay cuminsa operacion prome cu fin di Juli, Dangote a bisa, operando hunto cu un planta di fertilisante y podera pa un stacion di energia di 435-megawatt. Na capacidad completo, al menos 40 porciento di producto petrolero fabrica eynan ta bay ta disponible pa exportacion, resultando den un ganashi significante di divisa pa Nigeria, el a agrega.
Ademas di crea diesmiles di cupo di trabao, autoridadnan ta kere cu e refineria por reforsa suministro di fuel na Africa na un momento unda algun di su refinerianan ta operando hopi bao di nan capacidad.
Adresando varios hefe di nacion Africano na e ceremonia di apertura, Muhammadu a bis cu e proyecto ta mustra e importancia di partnership cu sector priva “pa acelera crecemento economico na e continente.”
Algun analista ta kere cu e capacidad di e refineria por ta limita mientras Nigeria ta lucha contra hortamento masivo di petroleo cu a causa cu produccion di crudo a cay na un nivel mas abao den varios luna recien, afectando ganashi di gobierno y limitando capacidad pa ehecuta proyectonan importante.
“E refineria Dangote no ta un ‘silver bullet’ pa tur problema den sector di energia na Nigeria,” segun Olufola Wusu, experto den azeta y petroleo ken tabata parti di un team cu a yuda evalua politica di gas di Nigeria. Sinembargo, el a bisa cu ta un tremendo start pa rebiba e sector. “E ta bay resolve e problema di crea capacidad domestico pa productonan refina y basicamente ta bay provee un industria nobo diferente di uno dependiente riba importacion,” el a agrega.
No ta cla ki acuerdo ta na lugar cu companianan petrolero mayor di Nigeria, pero e refineria tambe ta bay busca pa cumpra azeta fuera di e pais si e produccion limita di crudo na Nigeria ta persisti, Wusu a agrega.
E movida ayera ta “un momento decisivo pa sector di energia na Nigeria, pa e region y den sector internacional,” segun Mele Kyari, cabesante di compania nacional petrolero di Nigeria.
