El a bira conoci dia cu el a dicidi di tuma accion y lanta su voz. Pa algun hende e ta un persona luchado pa medio ambiente y pa su tera, locual el a demostra un biaha mas ora a presenta hunto cu un grupo di hende den pleno discurso di prome minister di Aruba, dia 18 di maart ultimo, pa bolbe lanta nan voz y bisa “tuma accion ambiental na serio.”

Den un entrevista cu Bon Dia Aruba a tene cu Nigel Maduro, el a trece dilanti cierto punto cu ta causa preocupacion. Pa e motibo, ey su persona hunto cu un grupo di ciudadano a dicidi di bay protesta na Plasa di Betico dia 18 di maart, na unda nan a interumpi e discurso di prome minister Evelyn Wever-Croes.

“Nos a haciele 18 di maart pasobra e dia ey a cuminsa un protesta y nos kier a trece e mensahe dilanti cu nos ta den un crisis di medio ambiente. Tin hopi daño cu ta pasando, por ehemplo cu nos tin demasiado hotel y e turistanan mes ta gritando y bisando cu nos no por mas cu hotelnan. Tambe tin e cuestion di hopi tereno unda cu ta rosa of ta bende e mondi pa hendenan di afo, cu ta rico, cu tin placa y ta laga e bestianan nativo perde nan habitat den nan ecosistema,” Maduro a sigura.

El a trece dilanti tambe e problema di awa di riool cu ta drenta lama sistematicamente, loke ta haci polucion; e situacion di oilspill cu a yega Aruba y cu den su opinion, instancianan no a bati alarma; cambio di clima unda Aruba cada dia ta birando mas caluroso. “E aña aki meteorologicamente, a bati alarma cu Aruba ta hayando mas calor y Aruba ta un di e paisnan mas afecta na mundo a base di e temperatura cu ta subi.”

Pa Maduro, ta hopi punto pa loke ta trata medio ambiente cu gobiernonan no ta tumando na serio. “Esey nos kier purba di trece dilanti pa cuminsa tum’e na serio pasobra nos economia ta a base di nos naturalesa. Nos mester di dje pa nos haya nos economia y nos pan di cada dia. Si nos no ta worry cu nos medio ambiente, nos lama ta bira sushi, mondi ta ser corta, cu tur e cosnan aki ta bay tin turistanan cu no lo kier bin Aruba mas. Hendenan ta lubida cu Aruba ta birando caro pasobra nos ta hayando mas hotel, mas inversionistanan ta trece mas inflacion y p’esey nos kier cuminsa trece dilanti cu efecto di medio ambiente y tur loke ta pasando ta bay laga e sistema ecologico, economico y social cay,” el a bisa.

Maduro y su grupo kier sigui pone presion tanto na Gobierno como na Parlamento di Aruba manera el a sigura, pa nan cuminsa tuma e pasonan necesario den poder y pone medio ambiente den prioridad como discusion, “nos tin solucion, nos tin ideanan, pero nos no tin e oido di e lidernan pa scucha nos, pueblo mes ta gritando nan mal contento pa cosnan cu ta pasando na Aruba, e ora ey miembronan di parlamento y gobierno tin cu refleha e pueblo, pasobra nos a pone nan eynan pa un motibo.”

Ademas, el a afirma cu el a yega di papia cu minister encarga pa Naturalesa y Medio Ambiente, Ursell Arends, pero te ainda no a logra concretisa un reunion formal cune, el a pidi na minister un audiencia pa sinta y papia di e tema aki.

Tambe, el a trece dilanti e encuesta cu Oficina di Turismo (ATA) ta realisando pa hendenan local, den su opinion, Maduro a contesta cu el a participa hunto cu grupo den encuesta aki pa motibo cu ta un ocasion pa por haya data y ATA cuminsa haci algo cu e data aki. “Mi kier sa ki dia e resultadonan ta bay sali y kico nan ta bay purba di haci, si lo tuma prioridadnan na cuenta pasobra nan tambe ta ripara cu nos ta den crisis di medio ambiente, sinembargo, el a bisa cu “ATA a laga algun cosnan afo, e preguntanan tabata ‘mucho bunita’ mientras tanto cu e realidad di e pregunta mester ta mas serio pa refleha e realidad di Aruba.”

Dianan pasa, tambe a bira conoci un process-verbal e cual tabata hopi controversial pa motibo cu den e documento ta señala cu minister di Husticia Rocco Tjon ta solicita pa duna e caso di Maduro prioridad, esaki ta relaciona cu na september di aña pasa Maduro a pinta e rotonde di e Briekel y otro luganan cu e palabranan “No More Hotels” pa esaki Maduro a comenta cu e no ta haya e situacion aki integro, “ki mishi un minister ta mete den asuntonan of ta duna opdraag na recherche pa duna prioridad na mi caso, pakico? Mientras tanto cu tin hopi otro problema social na Aruba, como pedofilia, batimento di hende muhe, corupcion den funcionnan halto, pakico e casonan ey no ta haya prioridad y mi caso si? Mi no ta un menasa pa sociedad di Aruba, mi ta solamente un ciudadano cu ta fada di e sistema.”

Maduro ta considera cu nan ta purba di forsa y abusa cu nan poder pa asina hendenan keda keto, “pero a mi no ta bay keda keto, pasobra mi ta bisando hopi cos fout di e sistema, nan ta kere cu poniendo mi caso un prioridad, no ta bay sali den dia cla, mas nan ta haci cosnan asina, mas mi ta bay papia y mustra tur e pueblo di Aruba cu cosnan sushi ta pasando y esey no ta bon, no ta husto,” el a bisa.

Pa finalisa, el a expresa cu e lucha pa naturalesa ta bay sigui, cu nan ta bay continua exigi pa Gobierno y Parlamento cuminsa tuma pasonan den esaki, nan grupo ta bay sigui papia cu comunidad pa motibo cu nan mester sa kico ta pasando na Aruba, “nos tur ta wak kico ta pasando, ATA mes ta wak kico ta pasando, Fundacion Parke Nacional Aruba tambe sa, mientras tanto e hendenan den poder cu ta supone di yuda nos no ta haciendo nada, nos ta bay sigui den e lucha y nos ta bay bin cu nos mesun solucion duradero cu of sin nan autorisacion y e ta bay bira algo grandi y internacional,” Maduro a afirma.