Ayera mainta den un conferencia di prensa na Ayo Rock Formation, Nigel Maduro, conhuntamente cu Oriana Wouters y Miguel Van Der Velden, kendenan ta representando un grupo di ciudadano preocupa, a trece dilanti un anuncio pa comunidad di Aruba y algun peticion pa e futuro lidernan di e pais.

Nigel Maduro, ken ta un cientifico den sostenibilidad y ken a bira conoci door di su defensa pa medio ambiente, recientemente a ser scogi door di Caribbean Climate Justice Leaders Academy pa representa Aruba na United Nations Climate Change Conference (COPP) na Baku, Azerbaijan na november, unda lo tin hopi lider y creadonan di politica global cu lo papia tocante cambio di clima.

Maduro a conta cu despues cu el a bin cu vakantie na Aruba aña pasa, el a mira diferente situacion alarmante.
“Mi a wak hopi rosamento den mondi, hopi construccion, bashamento di asfalt, menos bestia cu normalmente Aruba tabatin y hopi cambio, un Aruba asina overcrowded cu turistanan,” el a bisa.

El a ripara cu tabatin menos mata y tabatin mas calor. “E mondinan cu a mi tabata hunga ora mi tabata chikito a wordo rosa completamente, lamannan unda mi tabata bay cu mi famia tur diadomingo tabata sushi of shinishi cu slodge of lodo, tambe mi a cuminsa ripara cu den nos bida marino ecosistema ta cayendo den otro,” Maduro a señala.

Parti di su preocupacion ta cu naturalesa ta sufriendo hopi, “pero nos no tin e atencion for di nos lidernan.” El a splica cu for di cuminsamento di e luna aki el a manda carta na e lidernan expresando kico ta pasando cu Aruba, pero “mi a wordo ignora. Mi a manda hopi carta y mi a purba di papia cu hendenan cu poder y nada no a pasa. Eynan mi a cuminsa post riba diferente red social riba nos ecosistema. Despues mi a cuminsa cu e graffiti, cu e protesta di graffiti unda m’a skirbi No More Hotels y Land Back,” el a splica.

El a entrega su mes na warda di polis manera tur hende sa y el a keda cera pa 3 dia. “Mi a sacrifica mi mesun libertad pa e medio ambiente di Aruba. Mi a duna mi mes 20 ora tambe di servicio comunitario y esey mi a cumpli cu orguyo,” el a bisa.

El a haci protesta dia 18 di maart ultimo interumpiendo e discurso di prome minister Evelyn Wever-Croes pa trece dilanti e crisis ambiental.

Recientemente el a haci e Beach Party na cinco diferente luga, tur diadomingo, pa asina sinta dilanti di e lama unda hotelnan ta wordo construi pa duna workshops educativo tocante sostenibilidad pa trece hende hunto, y turistanan y local tabata sinta cu nan pa intercambia idea y pensamento.

Den su opinion, industria di hotel y turismo no ta sostenibel mas, y ta exigi pa publica e resultado di ATA su encuesta di “Local sentiment survey” – nan ta puntra unda e resultado ta cu tabata supone di a sali entre luna di april y juni.

Di su parti, Oriana Wouters, ken ta biologo y ta enfoca riba sistema marino, derecho humano y derecho climatico, a trece dilanti cu e concepto di desaroyo na Aruba mester cambia pa motibo cu e crisis ecologico a bira un crisis climatico y cu door di e cambio climatico aki e rosamento y kitamento di diversidad ta afecta e balans ambiental.

“Loke ta bay pasa ta cu den futuro e fenomenonan aki ta bay solamente empeora, nos no ta na un caminda pa nos bisa nos ta bay planta un par di kwihi cu watapana pa crece back, nos no ta eynan. Nos mester di innovacion cu ta regenerativo, un economia regenerativo. Si nos wak den ultimo 30 aña cua actividad nacional berdaderamente tabata regenerativo, cu ta haya mas hende na Aruba tin un estudio avansa. Nos ta wak mas bien un copia di Miami cu Orlando, esey nos ta mirando,” Wouter a bisa.

Miguel van der Velden ken ta un environmental consultancy cu ta traha cu Nacionnan Uni den proyectonan di desaroyo den varios pais den Caribe, a bisa cu loke el a mira na Aruba ta un nivel di desaroyo cu no ta sostenibel y cu ta hopi mas avansa cu e mayoria di islanan unda el a traha.

“Esaki kiermen cu nos desaroyo ta menos sostenibel cu e otro islanan y esaki ta door cu nos a crece nos turismo asina hopi den ultimo decadanan y nos ta e pais cu ta mas dependiente riba turismo.”

 

Anuncio cu exigencianan pa esnan cu lo lidera Aruba den futuro

Pa loke ta trata e anuncio, Maduro a sigura cu nan no ta politico, nan no ta bay subi lista, ni nan ta bay pa niun partido politico. “Nos ta un grupo di ciudadano preocupa tocante e situacion di medio ambiente na Aruba y nos ta experto den nos ramo, nos a bay pafo di Aruba, busca un estudio y bin back y enfrenta tur e cosnan aki. Bo ta suposse di scucha nos, nos ta expertonan den e cosnan aki.”

Awor cu eleccion ta bay tuma luga dia 6 di december unda partidonan ta bay cuminsa presenta nan plan, Maduro a sigura cu nan ta bin cu 4 exigencia pa tur partido politico y pa tur e futuro lidernan di Aruba. “Nos ta bay tin exigencianan pa boso nan.”

E prome exigencia ta e cantidad di camber cu tin na Aruba. “Nos a surpasa e capacidad di Aruba, nos no por wanta tur esakinan y e prome exigencia cu nos no ta bay negocia ta esaki: cera tur e hotelnan, condos, vacation rentals den construccion cu ta pa turismo, cera nan.”

Di dos exigencia ta pa crea un ley nacional cu ta bisa cu hendenan di afo, sea stranheronan of inversionistanan no por cumpra tereno ni real state na Aruba. “Claramente nan ta usando e pa haya placa y sak’e for di Aruba. Unda e terenonan y real state pa localnan ta?”

E di tres exigencia ta pa esun cu ta bay lidera Aruba den futuro, e partido politico, gobernante, minister, nan ta exigi na nan pa declara Aruba y pa reconoce cu Aruba ta den un crisis ecologico, un crisis ambiental, crisis climatico, “y esakinan ta bin di perspectivanan di conservasionistanan expertonan den sostenibilidad manera a nos.”

“E prome stap pa bay dilanti ta pa admiti cu nos ta den un sistema cu no ta sostenibel y cu nos ta den un crisis, asina nos ta bay dilanti,” el a sigura.

E di cuatro exigencia ta pa cualkier partido politico of cualkier hende cu tin poder, bin cu un plan pa e crisis aki, “bin cu un plan duradero, cu detayenan, hink’e den bo programa y mustra cu bo ta bay yuda Aruba pasobra, sin Aruba su naturalesa nos no ta nada. Nos turismo ta bay bin back Aruba si tur e cosnan aki ta pasando,” el a finalisa.