Manera autoridadnan policial a informa diahuebs mainta, a detene e persona cu a pone graffiti riba e muraya di e escultura di driekel cu recientemente a keda inaugura. Ayera diabierna, Nigel Maduro a recobra su libertad den oranan di atardi y pa esaki, activista Anouk Balentina a trece dilanti su opinion y hasta e artista creador di “Mama Driekel” a duna su punto di bista.

Tabata dia 29 di september ora Aruba a keda conmociona debi na varios graffiti cu un persona a pone na diferente parti di Aruba. Pa algun tabata representa un solicitud pa Gobierno di Aruba no duna mas permiso pa construi hotel, pero pa otronan, tabata un simbolo di destruccion cu por afecta turismo.

Anouk Balentina: “Activismo di graffiti ta e grito silencioso contra vandalismo ambiental”

Pa esaki, abogado y activista ambiental Anouk Balentina kier a trece dilanti su opinion tocante e caso aki, indicando cu “den curason di e cultura di e cayanan di Aruba por haya expresionnan artistico poderoso cu ta manda un señal fuerte y claro contra inhusticia y mal gestion. ‘No more hotels’ a resona masha hopi riba rednan social recientemente, na unda hasta turistanan ta apoya y aplaudi cu entusiasmo e mensahe. Na mesun tempo autoridadnan y medionan di comunicacion a apresura di califica esaki como ‘vandalismo,’ ‘destruccion’ of solamente pa sconde e berdad un biaha mas,” e ta bisa.

Destruccion den Codigo Penal di Aruba, den articulo 2:334 lid 1 ta establece cu: “Hij die opzettelijk en wederrechtelijk enig goed dat geheel of ten dele aan een ander toebehoort, vernielt, beschadigt, onbruikbaar maakt of wegmaakt, wordt gestraft met gevangenisstraf van ten hoogste twee jaren of geldboete van de vierde categorie.”

Balentina ta puntra si ta husto pa etiketa e forma di arte cayehero aki y si por yama “destruccion” un mensahe cu ta inspira y ta habri wowo di hopi hende, manera e ta sigura.

Incluso riba Facebook tambe por a mira e comentario di e mesun artista Arubiano, Gilbert Senchi cu a traha e obra di “Mama Driekel,” unda el a bisa cu “cada persona por contribui na su manera, dependiendo di su desaroyo personal of capacidad humano, na bienestar di nos comunidad. Por mira claramente cu e intencion di e persona no tabata dirigi contra e monumento di driekel,” Senchi a skirbi riba Facebook.

Pa Balentina, esaki ta “ironia, pasobra e destruccion berdadero ta ser causa pa accion y inaccion di ‘kortzichtige beleidsmakers en falende bestuurders.’ Ora ciudadanonan comun ta denuncia abuso, nan voz ta ser silencia y nan kehonan ta ser ignora. Incluso bay na corte ta algo inutil, pasobra gobierno simplemente ta ignora e ordennan hudicial. Nos por tuma como ehemplo reciente e caso di Parkietenbos y e caso contra construccion di Secret’s Hotel.”

Ademas el a reitera cu “e vandalismo mayor no ta bin for di un boter di spray. Ta bin di esnan cu ta crea politica y ta desperdicia nos futuro, impulsa pa un vision di corto plaso, ciego pa e dañonan a largo plaso pa naturalesa y patrimonio. Destruccion ta e mutilacion di nos patrimonio natural rico y daño na nos fragil medio ambiente a traves di, entre otro, un construccion di hotelnan mayor a pesar di e capacidad di carga cu a logra durante añanan, a traves di contaminacion di aire y mala gestion di desperdicio (awa). Esaki ta bira mas claro ora ciudadanonan manera ami ta denuncia varios biaha violacion criminal di ley visibel di parti di e bestuur y su socionan, cu ta ser ignora completamente pa Ministerio Publico. Si, e homber aki a expresa su mal contento cu un boter di spray y tur e aparato ta persigui’e y cer’e manera ta un criminal grandi. Incluso hendenan a yega di purba di cer’e mas tempo cu esun cu ley ta permiti. Despues di tur cos, vandalismo ta castigable, pero no ta basta pa mantene un hende den prison preventivo durante un periodo di tempo largo.”

Balentina ta di opinion cu e discrepancia ta impactante, “debi cu un ciudadano por bay cera pa un delito menor, mientras cu otro ministernan cu deliberadamente ta daña nos cultura y beyesa natural, no ta pone normanan di proteccion y incluso no ta cumpli cu leynan vigente, Ministerio Publico ta pordona nan y no ta procesa nan. Ken ta e berdadero vandalo? E berdadero vandalo no ta den nan oficinanan bunita cu un bista masha bunita mes y amobla cu placa di impuesto. Na nan sombra ta e heroenan berdadero di Aruba: Activista y ciudadanonan cu a dicidi di pone den riesgo tur cos pa un Aruba mas sostenibel y husto.”

Nigel Maduro a bay na Strandpolitie di manera boluntario

Ayera den oranan di atardi, redactor di Bon Dia Aruba a haya informacion cu e activista a recobra su libertad algun rato prome. Ademas tambe Bon Dia Aruba a haya e confirmacion cu Maduro a bay te na strandpolitie di manera boluntario y no cu a keda aresta pa autoridadnan, manera otro medionan local a informa.

Maduro ta un persona basta conoci riba rednan social pa su activismo defendiendo medio ambiente di Aruba.

For di 29 di september cu e graffiti a ser aprecia pa comunidad di Aruba na rotonde di Driekel ubica na Eagle, a lanta un movecion riba rednan social relaciona cu e demanda pa no tin mas construccion di hotelnan na Aruba. Ademas for di diahuebs ultimo cu e noticia a bira conoci cu Maduro ser deteni, a cuminsa un otro movecion denomina #FreeNigel, incluyendo e mesun artista Arubiano, Gilbert Senchi ken a traha e obra “Mama Driekel” y tambe a sostene Maduro den su protesta riba rednan social.

Den e caso aki, tabatin diferente opinion causando un debate na unda no por laga na un banda esnan cu a califica e acto aki como vandalismo y/of destruccion cometi “contra e obra, cu por afecta Aruba como isla turistico. Hopi tristo pa mira algun hende ta vandalisa obranan publico pa transmiti nan mensahe. E hendenan aki no ta consciente cu nos ta biba y depende di turismo! Un acto inaceptabel y condenabel,” cual tabata e reaccion di minister di Turismo, Dangui Oduber e dia di ayera.

Pero tampoco por laga un banda loke turistanan tambe a trece dilanti relaciona cu construccion di Secret’s Hotel unda cu entre otro, nan ta señala cu e hotel aki “ta bay daña e zona trankil cu tin den area di Colony y ta bay bira un otro Palm Beach cu tin suficiente turismo caba.” Esaki ta algun di e comentarionan di turistanan riba rednan social.