Mediante un publicacion riba su pagina di Facebook, activista local Nigel Maduro a conta tocante su testimonio cu el a duna na nomber di Aruba na e Asamblea di Pueblo durante e audiencia di Husticia di Clima na Corte Internacional di Husticia na Den Haag.

Maduro a conta cu riba dia 5 di december y riba di tres dia di el a forma parti di un grupo di studiante di Isla di Pacifico y Hobennan Indigena di tur parti di mundo cu a uni pa dirigi nan mes directamente na e huesnan pa garantisa cu nan futuro y e futuro generacionnan ta ser proteha.

E activista a splica cu el a papia tocante con e crisis di cambio di clima di Aruba ta interconecta cu herencia colonial cu a keda atras y con su efectonan duradero ainda ta ser sinti awe, y con e ta conecta cu derechonan humano.

“Deforestacion, aumento di temperatura, aumento di nivel di lama, desertificacion, secura, perdida di biodiversidad, derechonan di pueblonan Indigena, cultura, perdida di tereno, perdida di biodiversidad y industria di hotel y turismo neocolonial tambe a wordo discuti durante mi testimonio,” el a indica.

For di 3 pa 5 di december na Den Haag a tuma luga e Asamblea di Pueblo, un reunion mundial di prome tipo cu ta amplifica e voznan di prome liña durante un momento crucial pa husticia di clima. Segun cu Corte Internacional di Husticia (ICJ) ta conduci audiencianan oral riba e Opinion di Conseho di Clima (ICJAO), e atencion di mundo ta riba con derecho internacional por atende e crisis di clima.

E Asamblea di Pueblo tin como meta complementa e audiencianan aki, ofreciendo un plataforma pa esnan mas afecta pa cambio di clima pa comparti nan experencianan, influencia, e Opinion di Conseho, y exigi husticia.

E evento aki tambe ta sirbi como un bista di loke ta bin di e Tribunal di Futuro Generacionnan. “Nos asambleanan regional lo sigui cu e trabou aki, reuniendo testimonio y pushando pa cuadronan legal innovativo pa proteha e derechonan di futuro generacionnan. E Asamblea di Pueblo ta nos prome campaña den un movemento mas amplio pa husticia.”

Den luna di november Maduro a ser scogi pa Caribbean Climate Justice Leaders Academy pa asina representa Aruba na COP29 – United Nations Climate Change Conference cual a tuma luga na Baku, Azerbaijan.

Esaki tabata un proceso den cual el a uni na un academia cual tin di nomber Caribbean Climate Justice Leaders Academy, esaki ta trata di un programa cu ta ofrece e oportunidad unico na hobennan defensor di medio ambiente y lidernan comunitario den Caribe pa siña tocante husticia climatico, pa nan interactua cu esnan encarga di crea e politica global y asina promove accion climatico.

Maduro a splica anteriormente cu di miles di aplicante nan a scoge alrededor di 50 persona di diferente isla di Caribe y el a keda den e top 8 di studiante di academia cu a bay representa nan isla cu tur gasto pago pa por asisti.

“E ta un honor y un privilegio pa mi por asisti y representa Aruba. Cu esaki mi por duna un voz na e situacion cu ta pasando, cada biaha cu mi papia na Aruba hendenan no ta tuma mi na serio, awor cu mi ta bay COP29 y representa Aruba na United Nations e ora ey mi ta bira un representante internacional cu hopi hende ta reconoce cu ta papia di cambio di clima,” Maduro a expresa den un declaracion e momento ey na Bon Dia Aruba.