Niesha Butler, ex-atleta di WNBA y software engineer ta mira Aruba como e conexion cu su mama fayecido; ‘Coding’ por brinda e oportunidad pa sali di pobresa

“Tin potencial na Aruba pa brinda e servicio di yamada y tambe riba tereno di informacion, particularmente pa motibo cu e pais ta multilingual.” Esey ta opinion di Niesha Butler. Butler, nativo di New York, ta un ex-baskebolista di WNBA y actriz. Y Niesha sa di kico e ta papia.

E tin un conexion special cu Aruba. Su mama, Alice a nace na New York di un mama Arubiano, y a biba gran parti di su bida cerca su welonan na Aruba. Y mescos cu su mama, Niesha kende nace na Brooklyn, New York, a pasa hopi tempo na Aruba cu su wela Carmen y bisawelonan, Johan y Alice Breetveld.

Mama di Niesha, Alice, kende a fayece algun aña pasa, a lanta na New York y Aruba, y su famia tabata hopi conoci na San Nicolas, en particular. Su welonan tabata propietario di e famoso Dutch Machine Shop na Congoweg. Niesha a lanta scuchando storia di un ‘landmark’ Arubiano. Y kizas esey a conduci tambe cu Niesha a dicidi pa studia programacion y awe ta un ingeniero di ‘software.’

Butler a haya su grado como Software Engineer despues di un carera exitoso den basketball, un deporte cu dun’e oportunidad resalta. Niesha te hasta a forma parti di ‘New York City All City Team’ pa cuater aña consecutivo. Te ainda e ta considera un di e top hungadonan di basketball na nivel di highschool.

Despues un aña cu New York Liberty, el a hunga na nivel profesional na Gran Canaria, Spaña y tabata e famoso atleta den e deporte, Stephon Marbury a acerk’e pa atende Georgia Tech. Asina Niesha a bira e prome atleta femenino di e Universidad renombra pa haya e titulo Rookie of the Year. El a aparece den pelicula di Spike Lee ‘She Hate Me’ y a protagonisa e pelicula ‘Bringing Rain’ di Noah Buschel, ademas di a aparece den e prome propaganda cu Lebron James a traha pa Nike, entre otro.

Pero e sanger di empresario ta den dje. Como mucha e tabata gana su placa ta bende T-shirt, como adulto el a traha den e sector corporativo di Petroleo y Gas Natural, y a lanta su prome compania basa riba tecnologia di informacion Sports DataBase Network na 2010. Y ta den curso di su carera como profesional den IT, cu Niesha a dicidi pa lanta e organisacion sin fin di ganashi , Ballin Technologies, pa brinda hobennan di barionan marginal na New York pa conoce e mundo di ‘coding,’ pa asina nan por tin perspectiva pa futuro.

Es mas e dia cu Bon Dia Aruba a combersa cu Niesha, net el a caba cu un sesion di diasabra. “Muchanan. Logico. E siman prome nan a registra, pero no a presenta, pero awe, nan no a registra pero a presenta.” Consecuentemente, e mester a prepara su staff con pa atende cu locual no a spera. “Pero di otro banda, nan ta haya e preparacion con pa anda cu muchanan cu no por sinta keto, no por enfoca, ta mucho emociona of ta haci mucho zonido. Nos tambe ta siña cu e proceso.”

Niesha no tin yiu, no tin ningun experiencia den duna les, pero den su trabao boluntario, bishitando scolnan, el a ripara con particularmente muchanan muhe tabata mustra interes den programacion y otro materianan STEM cu ta para pa ‘Science, Technology, Engineering and Mathematics.’ Niesha a dicidi pa brinda e programa STEAM Champs, cu tin arte den e curiculo.

“Mi tabata kier a habri e oportunidad pa nan. Pero mi tabata nervioso pasobra mi no tin experiencia den educacion. Pero locual mi a realisa ta cu mucha, locual mester haci ta mira nan. Laga nan ripara cu bo tin atencion y tin interes den nan. E momento ey nan ta haci nan maximo pa cumpli cu e expectativa.”

E STEAM Champs a capta hopi atencion na Merca mes y den un entrevista cu ABC News, Butler a splica cu e ta traha cu stagiairenan cu tambe a haya oportunidad pa prome biaha pa siña codifica. “Hende ta bende soñonan di basketball den nos comunidad. Mi a considera cu ta hopi importante pa bende e soñonan tecnico aki,” Butler a declara.

Na Bon Dia Aruba, el a amplia riba e intencion aki. “E porcentahe di personanan cu ta biba bao di e nivel di pobresa na New York ta hopi grandi. Mi a spanta. A cambio, tin miles y miles di cupo di trabao den tecnologia, particularmente den codificacion (coding) cu no por yena. Ta trabaonan cu ta paga salarionan cuantioso.” Den otro palabra, tin oportunidad, pero te cu awor, hopi hende di color na New York no a haya e posibilidad pa haci uso di e trayecto aki. Acceso na computer y wifi stabiel pa cuminza ta ausente den hopi di e hogarnan aki. Esaki ta un di e condicionnan necesario pa por brinda hobennan e espacio pa crece den e area aki. E centro di STEAM Champs di Butler, tin computernan y wifi continuo. Pues, hobennan cu atende e camp por ta sigur cu nan tin un luga sigur, unda nan lo por traha riba nan futuro den tur seguridad. Cifranan ta mustra cu hobennan cu participa na programanan asina, tin mayor probabilidad di caba enseñansa superior.

E mesun oportunidad mester tin pa muchanan na Aruba, Butler ta kere. Mas ainda, e hecho cu na Aruba ta papia diferente idioma ta haci e pais ideal pa traha riba e potencial aki, Butler a agrega.

Pero mientras cu e ta trahando pa brinda hobennan na New York e hermentnan necesario pa crece den e mundo tecnologico, Aruba ta keda e luga cu e ta bishita pa ta mas cerca cu su mama. “Mi a ripara cu desde cu el a fayece, cu Aruba ta yama mi. E ta un conexion emocional cu mi mama y mi lo t’ey pronto back na Aruba,” Niesha a bisa Bon Dia Aruba.