Nicolas Maduro tin amigo ainda?

Mientras cu e regimen di Nicolas Maduro ta aumentando dia tras dia e represion contra tur forsa politico cu no ta pertenece na nan proyecto socialista fracasa, nan por conta cu amistad ainda na Bestuurskantoor na Playa.

Mientras henter mundo, cu excepcion di Rusia y algun pais cu un agenda socialista tambe, a hala un banda y no ta mete den negoshi cu e regimen aki, na Aruba gobierno actual a pone henter su futuro den man di e gobierno mas nefasto y corupto na mundo.

Futuro economico di Aruba no ta depende di creacion di sector economico nobo, ya cu den dos periodo di gobernacion gobierno no a logra crea ningun. E ultimo informe provisional di Fondo Monetario Internacional ta haci mencion di e intento pa crea iniciativa nobo a traves di un programa di renobacion di uzo di energia renovabel, pero no ta bisa loke nos na Aruba si sa: nos no ta mira practicamente nada realisa di esaki.

Futuro economico no por conta riba turismo so, cu no ta den su miho dianan. Cifranan di Banco Central di e entradanan procedente di turismo ta indica cu aña pasa e entradanan aki tabata mas abao cu aña 2015 y cu e aña aki e cantidad di turista ta considerablemente menos cu na 2015. Ta facil pa bisa cu ta pordiosero so tabatin di aya banda, pero nan tambe tabata come y bebe aki. No tin motibo pa pensa cu algo lo cambia e rumbo facilmente, pasobra pa algo cambia, mester cambia e modelo turistico cu nos ta maneha. Y fuera di un ley inutil di all inclusive nos no a mira nada cambia.

Pero e noticia mas malo ta loke ta bin di Venezuela mes. Luna tras luna produccion di petroleo di e pais ta den un descenso mas fuerte. No solamente Venezuela a acorda dentro di OPEC pa baha nan produccion te net bao di 2 miyon bari pa dia, pero esaki ta oportunismo pasobra fisicamente nan no por produci mas tampoco. Segun estadistica di OPEC, produccion den e ultimo añanan a cay di 2,375 miyon bari pa dia na 2015, te 1,972 miyon bari na maart 2017. Tur esaki a hiba na un situacion unda Venezuela (PDVSA) no por cumpli cu tur compromiso cu nan tin di entrega obligatorio, manera e suministro di crudo na China cu a paga adelanta cu un prestamo biyonario. Entregando crudo barata na su afiliadonan politico den region (PetroCaribe) y apenas cumpliendo cu mercado interno, no ta resta tanto produccion pa bende na prijs di mercado.  Na e momento aki no tin ningun perspectiva pa aumenta produccion den direccion di e 3 miyon bari pa dia cu e tabata antes.

Tambe a caba di sali e noticia cu PDVSA su produccion a cay atrobe 7,7% den e prome tres lunanan di 2017, confirmando asina e problema grandi cu tin di mantenemento di e instalacionnan, pa falta di recurso financiero pa cubri esaki.

Esaki ta trece nos na e discusion clave y esencial pa e momento aki: kico ta bay pasa den e refineria? Gabinete Eman a pone tur su fichanan riba e reapertura di e refineria, pero resultado di esaki ta intimamente liga na loke ta bay sucede den e proximo lunanan na Venezuela. Nos por a comprende di un entrevista cu un lider di e sindicato activo na e refineria, cu bayendo cuatro luna den e aña aki, no tin gran actividad tumando luga y no tin gran cantidad di hende emplea tampoco. No ta prensa tabata papia di mas di mil hende na trabao ‘year round’, ta gobierno y e dirigentenan di Refineria di Aruba a haci esaki. Y nan a traha proyeccion di entrada pa gobierno basa riba e perspectiva aki.

Ademas e deal ta cu ta tres contratista mayor, cu na cabes e compania Frances Technip, mester haya financiamento pa por cuminsa traha, pasobra CITGO ni PDVSA tin manera di financia nan mes. Straño anto cu despues di e anuncio e contratistanan no kier a comunica cu Reuters, ni a tende nada mas di fia placa.

Si mester yega na un collapse di e regimen na Venezuela, ta casi sigur cu lo no cuminsa cu rehabilita e refineria, entre otro pasobra e recursonan financiero no lo t’ey. Y ademas cu tur e turbulencia cu ta sigui despues, lo por bay dura hopi tempo prome cu un siguiente gobierno Venezolano bay asumi responsabilidad pa algo cu nunca nan a faborece. Bao di presion publico lo ta logico cu nan lo tene nan inversionnan den nan mes pais. Y esey lo ta di comprende tambe, pasobra hiba crudo te Aruba pa mehora lo trece extra gasto, compara cu mehora crudo cerca di e posnan mes.

Prioridad na e momento aki ta percura pa PDVSA conserva su medionan di produccion mas importante, cu ta e posnan, e sistema di transporte, y e facilidadnan di refinacion den e pais mes.

En todo caso, nos gobierno a pone su futuro den man di e regimen mas desprecia na mundo, cu ademas no ta parce di kier, ni por duna prioridad na e proyecto na Aruba.