Nicki Minaj a resolve un demanda pa violacion di derechonan di autor, pa evita cu mester a bay huicio.
E rapper di 38 aña di edad mester paga e cantante y compositor Tracy Chapman $450mil pa ilegalmente usa su cantica di 1988 ‘Baby Can I Hold You’ den su cantica di 2018 ‘Sorry’.
Minaj tambe a bay di acuerdo pa paga e gastonan legal di Chapman. A acepta e oferta diahuebs, Page Six a reporta.
Chapman a entrega e demanda na october 2018 despues cu ‘Sorry’ a leak na Dj Funkmaster Flex y a bira viral online. E cantica no tabata parti di album ‘Queen’ di Minaj.
Chapman, di 56 aña di edad a bisa cu Minaj a pidi permiso pa usa e cantica y Chapman no a bay di acuerdo cu e terminonan. Despues, supuestamente Minaj toch a bay door y usa e cantica toch.
“Nos a resolve solamente pa un motibo. E lo a costa nos mas pa bay huicio”, un representante di Minaj a bisa Pitchfork.
Mientras tanto, representantenan di Chapman a bisa: “Mi ta contento cu a resolve e asunto aki y gradici pa e resultado legal aki cu ta afirma cu derechonan di artista ta protegi pa ley y mester ser respeta pa otro artistanan. Den e situacion aki varios biaha a pidi mi permiso pa usa mi cantica; y cada biaha, di bon manera y lihe mi semper a bisa no.”
“Aparentemente Minaj a scoge di no tende y a usa mi composicion a pesar di mi intencionnan cla y expresa. Como compositor y editor independiente, mi ta conoci pa ta protector di mi trabao. Mi nunca a autorisa e uso di mi canticanan pa sample of a solicita un sample. E demanda tabata un ultimo recurso – busca den un esfuerso pa defende mi mes y mi trabao y busca proteccion pa e empresa creativo y expresion di compositornan y editornan independiente manera mi mes”, e declaracion a conclui.
