(AP) – Nicki Minaj su concierto na Manchester a keda posponi despues cu polis na Hulanda a descubri marihuana den su tasnan mientras e tabata preparando pa sali for di e pais.
Promotor Live Nation a bisa cu e concierto lo keda posponi y lo honra e ticketnan cumpra. “A pesar di Nicki su miho esfuersonan awe pa explora tur posibilidad pa logra haci awe nochi su show un realidad, e eventonan di awe a haci esaki imposibel,” e promotor a bisa den un declaracion. “Nos ta sumamente desapunta pa e inconveniente cu esaki a causa.”
Minja a publica anteriormente riba X cu el a keda deteni na aeropuerto di Amsterdam mientras e tabata cla pa aborda e avion pa e concierto na Manchester. Polis a bis’e cu nan a haya marihuana den su tas, y cu lo mester pisa esaki, el a tweet. Cannabis ta ilegal na Hulanda, pero ta tolera pa uso recreacional.
Robert Van Kapel, vocero di polis militar Hulandes, a bisa cu un muhe Mericano di 41 aña di edad a keda aresta pa exportacion di “soft drugs”. E no a identifica e muhe ni a elabora riba e tipo di droga en cuestion. Polis despues a tweet cu nan a duna multa na e muhe y el a keda den libertad.
Minaj, kende tin 41 aña di edad, a tweet cu e ta kere cu polis djis tabata kier pon’e cay laat pa su concierto na Manchester. “Mi a bisa boso, ta pa purba di pone mi yega laat pa asina nan por skirbi storia negativo. Jaloezie ta un malesa. Bo sa e resto,” Minaj a tweet.
Su representantenan no a responde inmediatamente na mensahenan diasabra.
E rapper naci na Trinidad ta miho conoci pa su hitnan “Super Freaky Girl,” “Anaconda,” y “Starships.” El a keda nomina la 12 premio Grammy durante transcurso di su carera. E concierto na Manchester ta parti di su tour “Pink Friday 2,” cu ta inclui concierto na Paris, Polonia, Alemania, Romania y Suisa.
