Gobierno Nicaraguense a libera 91 manifestante ayera, incluyendo 16 activista aresta na Nicaragua na november pa hiba awa na manifestantenan. Esunnan libera ta inclui un lider estudiantil kende ta Belga di dobel nacionalidad.
Ministerio di Interior a bisa cu tur 91 a ser libera bou un forma di aresto domiciliario. A bisa cu e liberacion tabatin como meta ‘contribui na reconciliacion nacional’, y a reconoce e rol di Papal Nuncio, Waldemar Sommertag, y Cruz Cora Internacional den e proceso.
Familiarnan y lidernan comercial a confirma e liberacion di varios di e activistanan, y otronan a confirma nan propio liberacion den mensahenan riba rednan social.
Esunnan libera ta inclui activista Belga-Nicaraguense, Amaya Coppens. Coppens tabata un di e activistanan aresta dia 14 di november ultimo y acusa di transporte ilegal di arma.
Un lider estudiantil aresta e momento ey, Maria Margarita Hurtado, a bisa periodistanan cu ‘mi ta liber y cla pa sigui lucha pa e otro presonan politico y pa un Nicaragua liber’.
E activistanan tabata busca pa yuda muhenan participando den un welga di hamber na un iglesia na Nicaragua. E welga di hamber tabatin meta di caba cu detencion di 150 manifestante kende ainda ta cera despues di un accion di gobierno riba demostracion contra presidente Daniel Ortega.
Protestanan principalmente lidera pa studiantenan a explota na april 2018 riba un reforma di siguridad social y a amplia pa inclui un exigencia pa retiro di Ortega y eleccionnan trempan.
Centenares di manifestante a ser libera den pasado, incluyendo Coppens.
