Manifestantenan anti-gubernamental cu ta preso den e prizon “La Modelo” di Nicaragua a desaparece despues cu nan a ser golpia y intimida pa “forsanan anti-motin,” e Comite Pro Liberacion di Preso Politico a informa ayera.
E denuncia di e desaparicion a ser haci pa otro manifestantenan cu ta deteni den e prizon, a traves di un carta, e comite a precisa den un anuncio publico.
E abogado di Comision Permanente di Derecho Humano (CPDH) Julio Montenegro, cu a apoya e denuncia, a detaya cu segun e investigacionnan di e organismo, e presonan a ser agredi pa un grupo di entre 400 pa 500 miembro di e Sistema Penintenciario Nacional (SNP).
E agresion señala pa e presonan a sucede diamars pasa, di acuerdo cu e carta, ora forsanan anti-motin acompaña pa cacho a drenta na e galeria 16 di e luga unda nan a “ataca e presonan”.
E escena a ripiti un ora despues “cu a provoca temor y a terorisa e presonan,” di acuerdo cu e denuncia, cu ta precisa cu 50 hoben a ser hiba na e cel di castigo y otronan, di cual no a specifica e cantidad, a ser hiba pa e area “300”, un di e seccionnan di mas mal nomber di e prizon “La Modelo”.
E denuncia di maltrato di manifestantenan aresta den cuadro di e crisis socio-politico cu Nicaragua ta biba aden desde april 2018 no ta nobo y esun mas reciente a sucede na februari den e prizon di muhe “La Esperanza”.
