(DW) – Minister di Asuntonan Exterior di Nicaragua, Valdrack Jaentschke a bisa diasabra ultimo cu Gobierno di Daniel Ortega ta traha “man den man” cu Rusia “pa e surgimento di un orden mundial multipolar nobo.”
Durante un acto den cual a otorga e orden di José de Marcoleta, den e Grado di Gran Cruz, na e embahador Ruso na Nicaragua, Alexander Khokhólikov, Jaentschke a destaca cu Moscu y Managua tin “casi 80 aña di a establece relacionnan diplomatico” y cu a fortalece durante e prome Gobierno Sandinista (1979-1990).
“Nicaragua semper tabatin e apoyo y solidaridad di Union Sovietico”, lidera pa Rusia, e minister di Asuntonan Exterior Nicaragüense a recorda, segun e medio oficial di Managua.
Den marco di e Guera Friu, Nicaragua a experencia un guera civil den añanan 1980 entre e “contra” -financia pa Merca- cu a bringa for di seronan contra e Sandinistanan, aliadonan di e defunto Union Sovietico y Cuba, cu a laga miles di morto.
“E relacion historico aki entre pueblonan y paisnan ruman a profundisa na nivelnan di partnership strategico, bou di liderazgo di presidente Vladimir Putin y nos comandante Daniel Ortega Saavedra, ken cu un vision cla di e retonan cu mundo ta enfrenta awendia, ta traha hunto, man den man pa e surgimento di un orden mundial multipolar nobo, mas husto, mas sostenibel, den pas, siguridad y bienestar,” Jaentschke a bisa.
E minister di Asuntonan Exterior di Nicaragua a splica cu “ta den e contexto historico aki cu awe nos ta condecora” e embahador Ruso “ora a conclui su mision diplomatico exitoso, pa su contribucion valioso den fortalece relacionnan di hermandad, solidaridad y cooperacion entre Rusia y Nicaragua.”
Di su banda, Khokhólikov a enfatisa cu gobiernonan di Rusia y Nicaragua “ta comparti e mesun balornan y ta bringa hunto pa e derecho di tur pueblo riba desaroyo di ciudadano progresivo y pacifico, basa riba respet mutuo, di acuerdo cu ley internacional y un garantia solido di seguridad y bienestar pa un y tur.”
E ceremonia a conta cu presencia di Laureano Ortega Murillo, yiu di presidente Ortega y e vice-presidente, Rosario Murillo, ken ta ocupa e puesto di consehero presidencial pa Inversion, Comercio y Cooperacion Internacional, y representante special di e presidente di Nicaragua pa asuntonan cu Rusia.
