Gobierno di presidente Daniel Ortega, a traves di su canciyeria a ataca diaranson pasa e secretario general di Organisacion di Estadonan Americano (OEA), Luis Almagro, cu a ser tilda di ta ‘mentiroso, calumniador y violento’ pa a denuncia na comunidad internacional e violacionnan di derecho humano di e Nicaraguensenan desde april di e aña aki den e protestanan anti-gubernamental.
Asina e regimen Orteguista a expresa den un comunicado den cual tambe a anuncia e expulsion di e integrantenan di e Mecanismo Especial di Seguimento pa Nicaragua (Meseni) y di e Grupo Internacional di Experto Independiente (GIEI), ambos di e Comision Interamericano di Derecho Humano (CIDH).
Durante e XV Cumbre Latinoamericano di Marketing na Miami, Almagro a pidi comunidad internacional pa “asfixia e dictadura” na Nicaragua. E regimen di Ortega ta bisa cu e declaracionnan ey ta evidencia di “e escalada criminal y injerencista, promoviendo accion terorista”contra e regimen di Nicaragua.
Tambe gobierno di Ortega a menosprecia e trabao di Almagro den OEA, afirmando cu “ e no tin ni e capacidad ni e meritonan pa continua desempeñando e cargo.”
Gobierno di Nicaragua a manifesta ademas cu e declaracion realisa pa Almagro dia 16 di october dilanti Organisacion di Nacionnan Uni (ONU) unda el a bisa cu e practica represivo den e caso di Venezuela y Nicaragua ta bin di Cuba, ta parti di un “campaña iresponsabel, infame, y calumnioso” di Almagro contra e 3 paisnan.
