Pa prome biaha den mas di un aña, Carmen Crespo a logra na tin un momento di entretenimento cu tres di su nietonan. El a sinti e necesidad di hacie pasobra e kier a mira nan sonrisa, baila y comparti. E tabata kier a mira nan manera mucha. Tin poco momento di alegria den su famia desde cu mama di e muchanan a ser asesina y su curpa tira den un riu di e bario San Judas, na Managua, lora den plastic preto y pida laken.
Angela Veronica Crespo, yiu di Carmen Crespo, tabata un di e 49 muhenan asesina aña pasa na Nicaragua. E autor di e crimen awor ta cumpli un condena di 30 aña, pero e duele den e famia ta sigui. En total a keda 73 huerfano di e ‘femicidio’ nan aki. E aña aki ya a yega na 70, faltando casi un luna ainda pa aña caba.
E muhe tabatin dos yiu homber cu awor tin 3 y 4 aña, y un yiu muhe di ocho. E mama tabata traha como vigilante den un empresa priva y tabata proveedor pa su yiunan. E homber cu a mat’e no ta nan tata biologico y te awor nan no ta ricibi nada di e tata biologico tampoco.
E chikitonan ainda no sa cu nan mama a muri y ta pensa cu el a bay biaha. E mucha muhe si sa, pero tin momento cu e ta pensa cu e ta bolbe y ta bolbe puntra su wela ki tempo e mama lo bolbe.
Te awor, ni e mes ni su nietonan no a ricibi ningun tipo di atencion psicologico y awor ta asisti na e prome encuentro nacional di mucha huerfano pa femicidio, cu e speransa di haya e ayudo aki. Nan tabata invitado di e Fundacion Dina Carrión, cu ta atende e tipo di victima aki.
“E tipo di encuentro y actividad pa mucha huerfano pa femicidio ta fundamental pasobra nan por distrae. Hopi biaha e welanan ta concentra riba nan tristesa y e muchanan ta keda na segundo plano, tristo, desampara, cu miedo y cu necesidad di atencion specialisa, no nan so, sino henter e famia, pa por cera e ciclo di duele”, e psicologo Adilia Hernández ta splica.
Fundacion Dina Carrión ta e prome den e pais den atende directamente mucha di ken e mama a bira victima di femicidio.
