(DW) – Diadomingo ultimo, gobierno di Daniel Ortega a libera y expulsa pa Mexico, e casa y yiu homber di ex-director di Miss Nicaragua, Karen Celebertti, despues di casi dos luna cera cu acusacion di conspiracion, segun medionan y opositornan Nicaraguense a informa for di exilio.
“Na e momentonan aki, Martin y Bernardo Arguello ta bulando pa reuni cu Karen Celebertti,” e dirigente opositor di Nicaragua, Juan Sebastian Chamorro, amigo di e famia a skirbi riba red social “X.”
Medionan local a coincidi cu Martin Arguello y Bernardo Arguello Celebertti a ser libera diasabra ultimo y despues nan a ser transporta te nan cas ubica pafo di Managua, oficialmente a bira conoci cu a duna nan 48 ora pa sali for di e pais, pa loke nan a bay den un vuelo cu destino Ciudad di Mexico.
Ex-embahador di Nicaragua na Organisacion di Estadonan Americano (OEA) Arturo Mcfields, ken ta exilia na Merca despues di bandona gobierno di Ortega, tambe a sigura cu nan a ser “expulsa” pa Mexico, na unda Celebertti ta.
Gobierno di Nicaragua no a referi na informacion publica tambe pa otro medionan nicaraguense cu ta informa for di Costa Rica.
Ex-doño di frankicia di Miss Universo na Nicaragua a sali for di e pais pa motibo di e certamen mundial di beyesa na El Salvador, den cual e Nicaraguense, Sheynnis Palacios a gana 18 di november ultimo.
Despues di e coronacion, Celebertti a acompaña e Miss Universo nobo na un biahe cortico pa Mexico y ora a purba drenta Nicaragua back, regimen a nenga su entrada, su casa y su yiu a keda deteni na Managua.
Polis bao mando di Ortega a acusa Celebertti y su famia di participa “activamente” den accionnan terorista di e intento di golpi di Estado failliet, referiendo na protestanan contra gobierno na 2018, cu a laga atras casi 300 morto segun ONU.
