Organisacionnan di Estadonan Mericano (OEA) tabatin planea pa dia di ayera considera un proyecto di resolucion cu ta reclama gobierno di Nicaragua e liberacion di tur persona deteni durante e protestanan contra presidente Daniel Ortega, y avansa e dialogo cu oposicion.
E texto a ser debati na un sesion extraordinario di e Conseho Permanente di OEA pa analisa e situacion di e pais centro Americano, cu a ser sacudi desde mas di un aña pasa pa hopi manifestacion contra Ortega.
E iniciativa cu a ser presenta pa Canada, cu ta presidi e grupo di 12 pais crea na augustus na OEA pa busca solucion pa e crisis na Nicaragua, ta destaca e preocupacion pa e ‘institucionnan democratico deteriora y e derechonan humano na Nicaragua’, y ta yama e parti pa avansa ‘na un dialogo efectivo y di bon fe’.
Pa esaki, ta pidi pa e gobierno di Ortega e liberacion ‘incondicional’ prome cu dia 18 di juni di tur preso pa participa na e protesta, segun a acorda den e negociacion cu oposicion.
Tambe ta reclama pa permiti entrada di e Comision Interamericano di Derechonan Humano (CIDH) na Nicaragua, cual a ser expulsa for di e pais na december pa documenta e crisis grave di abusonan; pa inicia cu e proceso pa celebracion di eleccionnan ‘liber, husto, transparente y legitimo”’; pa duna garantia pa ehercicio liber di e derecho di manifestacion pacifica, y cu libertad di expresion; y e regreso ‘sin represalia’ di tur e exiliado di e crisis actual.
E ola di protesta contra Ortega, cu a inicia na april di 2018, a causa un violento represion estatal cu a laga 325 morto, centenar di persona deteni y 62.000 exiliado, segun organismonan di derechonan humano ta bisa.
