E secretario general di Organisacion di Estadonan Mericano (OEA), Luis Almagro, a pidi ayera ‘madurez’ di oposicion y gobierno di Nicaragua, y pa dialogo prospera. Dialogo a ser suspendi desde e 3 di april, di e cual e organismo ta actua como testigo.
“Nos mester madurez di dos banda, nos mester pa hende stop di gaña nos, nos mester esey, esey ta hopi importante”, Almagro a bisa durante un debate na universidad na Washington.
“Nos no ta hunga, nos no por, pasobra e necesidadnan di pueblo ta grandi, demasiado grandi, nos mester ofrece solucion. Asina cu nos no gusta ora hende ta participa den un wega politico cu e situacion aki, no ta tolerabel, no ta aceptabel pa nada”, el a sigura.
Na comienso di luna, gobierno di presidente Nicaragueño, Daniel Ortega a invita Vaticano y Secretaria General di OEA, dirigi pa Almagro, pa participa den e mesa di negociacion cu e oposicion di Alianza Civico, cu ta agrupa diferente sector di e sociedad, cu ta inclui e campesino, academico y empresario.
Un di e condicion cu e Secretaria General di OEA a pidi pa actua como testigo tabata e ex-carcelacion di ‘tur’ persona cu a ser deteni desde cu na april di 2018 a cuminsa e protestanan contra Ortega, cu a laga un cifra di mas di 300 morto y cientos di herido.
No obstante, Almagro a considera cu ‘celebra eleccionnan ta mucho lihe y tampoco por ta bon pa ni un hende”, pa motibo cu e partido politico mester tempo pa prepara.
