Gobierno di Nicaragua a libera ayera un grupo di 50 manifestante opositor cu tabata deteni pa protesta contra e mandatario Daniel Ortega, den e marco di e crisis cu a explota un aña pasa y cu a laga centenares di persona morto y deteni, y tambe miles den exilio.
E grupo cu a sali den un microbus for di e prizon di siguridad maximo conoci como ‘La Modelo’, a sali bou custodia di autoridadnan di e Sistema Penitenciario Nacional, segun e famianan di e persona deteni a reporta.
Den un comunicado, e Ministerio di Gobernacion a informa cu a libera 50 persona, entre nan tres muhe cu a keda na libertad condicional, meymey di e crisis cu e pais ta biba desde april di aña pasa.
“A traves di e Direccion General di e Sistema Penitenciario Nacional, e dia di awe a duna cumplimento pa 50 orden na fabor di personanan cu tabata deteni pa comete delitonan di siguridad comun y trankilidad publico” e Direccion a bisa.
Tambe a splica cu ‘e personanan aki a ricibi e beneficio legal di convivencia familiar y otro medidanan cautelar’.
E liberacion di e grupo nobo di manifestantenan anti- gubernamental aki a ser realisa oranan despues cu e Conseho Permanente di Organisacion di Estadonan Mericano (OEA) na Washington a celebra un sesion extraordinario na solicitud di Argentina, Canada, Chile, Costa Rica y Merca, pa ‘considera e situacion na Nicaragua’.
Tambe dos dia despues cu e mesa di negociacion cu e Gobierno a mantene cu e opositor Alianza Civico pa Husticia y la Democracia a conclui cu nan no tabatin acuerdo den e tema di husticia y democratisacion.
