E influyente diario La Prensa, e corant mas antiguo di Nicaragua, a anuncia ayera e ciere di su edicion imprimi di e suplemento satirico semanal “El Azote”, debi na e hecho cu e regimen di Daniel Ortega ta retene e papel pa e corant. Aduana tin papel di e corant wanta pa mas di un aña caba.
“Despues di casi 25 aña, El Azote semanal ta yega na su ultimo edicion,” e suplemento di humor ta bisa den su publicacion di diadomingo pasa.
Den un editorial, e suplemento aki a splica cu “pa biento cu ta supla, y como producto di e crisis provoca pa e ambicion desmedi di poder di e ‘parehita’ (Daniel Ortega y su esposa vice-presidente Rosario Murillo), e seccion aki ta despedi di boso, naturalmente, temporalmente.”
“E parehita dictatorial y delincuente ta kere, muy eroneamente, cu a traves di violencia, miedo, eliminando libertad, menasando o destruyendo medionan independiente di comunicacion, nan ta bay logra keda na poder,” El Azote a comenta. E publicacion a observa tambe cu “ta delicia di dictaduranan” pa oprimi o somete hende “pero solamente pa cierto tempo.”
E ciere di e suplemento di humor ta bin diez dia despues cu pa presion di e regimen di Ortega, e corant El Nuevo Diario, e segundo corant di mayor importancia di Nicaragua a cera. Hunto cu El Nuevo Diario a cera tambe e corant Metro y e medio digital Maje, tur di e empresa ND Medios, propiedad di e grupo financiero Promerica, di capital Nicaragüense.
El Nuevo Diario, funda na mei 1980 como alternativa noticiero pro-Sandinista, y cu den ultimo añanan a bira contra e regimen di Ortega, a pone fin na su edicion di papel y digital debi na “dificultad economico, logistico y tecnico cu a haci su funcionamento insostenible,” segun e corant a splica siman pasa.
