Alcalde di municipio Nicaragueño di Mulukuku, Apolonio Fargas, ken a permanece diesun luna den prizon pa via di e protestanan contra e gobierno di Daniel Ortega, ta exilia na Costa Rica pa motibo di siguridad, segun diadomingo pasa e Comision Permanente di Derechonan Humano (CPDH) a informa.
E ONG a confirma cu e alcalde a bay despues cu polis nacional a drenta den Alcaldia di Mulukuku, na e Caribe di Nicaragua y su residencia.
E asesor legal di CPDH, Pablo Cuevas, a bisa pa periodistanan cu e alcalde a dicidi di busca refugio na Costa Rica despues cu polis nacional dos siman pasa a ocupa mediante uzo di forsa e Alcaldia cu e tabata administra.
Un aña pasa, Polis a detene e alcalde cu tabata diesun luna den prizon y a acus’e di pertenece pa un grupo ‘terorista’ cu a ataca un delegacion policial durante e protestanan contra Ortega.
Fargas a ser acusa pa Ministerio Publico di delito di terorismo, asesinato, secuestro, hortamento cu intimidacion, y lesion grave contra cinco oficial di polis, pero a ser libera mei pasa bou un polemico Ley di Amnistia.
Segun Polis, e alcalde opositor ta un di e autornan intelectual y material di e atake pa e delegacion policial di e comunidad Sislao Paraska-Pueblo Nuevo, na Mulukuku, cu ta 247 kilometer di Managua, e dia 11 di juni di 2018 den e cual 3 polis y un civil a muri.
